Os traballadores de Siemens Gamesa nas Somozas queren evitar unha nova deslocalización da empresa
Os traballadores teñen postas moitas das súas esperanzas no encontro que se vai a celebrar desde as 9,00 horas deste martes, día 15, en Madrid e onde está previsto a presenza de responsables dos ministerios de Transición Ecolóxica e Industria, Xunta, da propia empresa e representantes sindicais.
Por Europa Press / Redacción | As Somozas | 14/12/2020 | Actualizada ás 17:34
O presidente do comité de empresa da planta que a multinacional Simens Gamesa ten nas Somozas, Sergio López (UGT), reclamou que "non se execute unha deslocalización con este centro de traballo". Insta o Goberno central e á Xunta a que "unan esforzos para esixir unha clara aposta de futuro" por este centro produtivo.
Así o trasladou o representante sindical durante unha asemblea realizada ás 10,00 horas deste luns, 14 de decembro, no primeiro día de paro total nesta empresa, que se saldou ademais con varias barricadas e cortes de estrada desde primeira hora da mañá, que impediron o acceso ao polígono industrial, o que xerou importantes retencións, sobre todo de camións con destino a outras empresas.
López detallou que os traballadores teñen postas moitas das súas esperanzas no encontro que se vai a celebrar desde as 9,00 horas deste martes, día 15, en Madrid e onde está previsto a presenza de responsables dos ministerios de Transición Ecolóxica e Industria, Xunta, da propia empresa e representantes sindicais.
"É necesario que ambas as administracións xunten esforzos para esixir da multinacional unha clara aposta de futuro polas plantas que ten en España e polo mantemento do emprego", detallou López.
"Sobre todo, no actual contexto no que o Goberno central vén de anunciar a posta en marcha do calendario de poxas de enerxías renovables en España para os anos 2020-2025, no que se ofrecen 60.000 megawatts (MW), a metade deles para a eólica", explica, "na que se obrigará á presentación dun plan estratéxico, que pode ser un bo contexto para aclarar o futuro das plantas de España e do seu emprego".
O presidente do comité de empresa da firma situada na comarca de Ferrolterra demandou "carga de traballo e futuro, porque a día de hoxe non hai confirmación de novos pedidos e xa hai seccións que acabaron a súa produción, o que sitúa a esta planta nunha situación crítica".
MÁIS DESPEDIMENTOS
Pola parte social denunciaron que "outros 29 postos de traballo está no aire, xa que o 21 de decembro vencen os contratos temporais e case con toda probabilidade non serán renovados", aos que hai que sumar os 59 que xa foron despedidos semanas atrás.
Segundo López, "é o momento no que Siemens Gamesa ten que apostar polo emprego en España". Por iso, pregúntase que "fai esta multinacional comprando pas en Portugal para montalas en Burgos, o mesmo que Iberdrola".
Por último, Sergio López instou aos traballadores a continuar cos paros convocados para este luns e martes e proseguir ao mesmo tempo coas concentracións nas rotondas de acceso ao polígono industrial nos horarios establecidos.
