O temporal Karim golpea Galicia con ventos de ata 157,7 km/h
O 112 informa de máis de 200 incidencias, principalmente árbores caídas, que se concentran na provincia da Coruña.
Por E.P. | SANTIAGO DE COMPOSTELA | 20/02/2021 | Actualizada ás 11:02
A borrasca 'Karim' que afecta a Galicia desde o venres deixou ao longo da madrugada do sábado precipitacións que superaron os 65 litros por metro cadrado nos municipios coruñeses de Zas e Santa Comba, ademais de ventos que acadaron os 157,7 km/h en Vimianzo.
Trátase dos valores máximos rexistrados nas estacións de Meteogalicia nas últimas horas, nas que o paso dun temporal supuxo unha madrugada de fortes choivas e ventos que manteñen a boa parte da xeografía galega en aviso. Os puntos máis chuviosos da noite foron no interior da provincia da Coruña. Así, Zas recolleu 65,7 litros por metro cadrado (l/m2), valores similares aos alcanzados en Santa Comba, con 65,0 l/m2.
En canto aos ventos, a pesar de atoparse todo o litoral en aviso laranxa, o refacho máximo produciuse tamén no interior da provincia da Coruña. Foi na Gándara, no municipio de Vimianzo, onde ás 03,20 horas alcanzáronse os 157,7 quilómetros por hora. Na costa houbo refachos que superaron os 120 quilómetros en varios puntos. A máis forte foi en Viveiro, co 143,4 km/h das 09,40; seguida polo 127,2 km/h rexistrados en Lira --Carnota-- ás 05,20 horas. Na montaña luguesa, en concreto na Pontenova, chegouse aos 126 quilómetros hora
INCIDENCIAS
O vento e a choiva deste temporal xerou ata o momento 220 incidencias na Comunidade entre o mediodía do venres e as 8,00 horas deste sábado, sobre todo por caída de árbores e ramas e retirada de obxectos das vías. Segundo a información do CIAE 112-Galicia, por provincias, a da Coruña foi a que levou a peor parte, cun total de 104 incidencias rexistradas, mentres que na provincia de Pontevedra houbo 89, na de Lugo 17 e na de Ourense 10. Por fortuna, non houbo que lamentar incidencias de gravidade.
En canto aos concellos, na provincia da Coruña destaca o de Ribeira, con 11 incidencias contabilizadas, catro no de Ames e Narón, respectivamente, e tres no Concello de Muros. Na provincia de Pontevedra destaca o Concello de Vigo, con cinco incidencias rexistradas, o de Cangas, con catro, e os de Pontevedra e Ponteareas, con tres cada un. Na provincia de Lugo, os concellos de Ribeira de Piquín, Riotorto e Palas de Rei rexistraron dúas incidencias cada un, as mesmas que o municipio ourensán de Boborás.
ALERTA LARANXA
Ante esta forte borrasca, as provincias da Coruña e Pontevedra atópanse en aviso laranxa por precipitacións, unha alerta que se manterá desde a tarde do venres ata o sábado e que se suma ao aviso do mesma cor que afecta a todo o litoral galego.
A Dirección Xeral de Emerxencias e Interior da Vicepresidencia da Xunta decidiu activar este aviso ante a previsión de precipitacións acumuladas en 12 horas de 80 mm no suroeste da provincia da Coruña, nas Rías Baixas e no interior de Pontevedra. Este aviso por choivas únese á alerta laranxa, decretada no mediodía deste venres, por ventos de ata 100 quilómetros por hora en todo o litoral galego, onde tamén se espera mar combinado que pode alcanzar os 7 metros na costa da Coruña.
Ambos os avisos, tanto o de choivas como o de vento na costa, continaurán vixentes este sábado, día no que, ademais, Meteogalicia manterá en aviso amarelo á práctica totalidade do interior galego por precipitacións.
