Critican que Política Social gaste 225.000 euros en asesores mentres “non ten para mercar sillóns ou arranxar goteiras”
A CIG denuncia que se gasten os cartos públicos en asesores e non en necesidades “prioritarias” de residencias de maiores.
Por Galicia Confidencial | Compostela | 20/03/2021 | Actualizada ás 14:00
O Gabinete de asesores nomeados a dedo por Fabiola García está composto por 8 persoas cun gasto total en nóminas de 225.000 euros ao ano, un montante que equipara a Fabiola Garcia cos gastos da Casa Real de Felipe VI en persoal de confianza. É a denuncia que fai a CIG que acusa a este departamento de dilapidar diñeiro en asesores e non en material neceario en residencias de maiores.
“Teñen dúas persoas para coordinarse entre si mesmos como coordinadores de gabinete e unha asesora de Parlamento e un Xefe de Gabinete, con catro persoas máis que non se sabe en que asesoran a Fabiola García”, indica este sindicato nun comunicado non que considera “absolutamente desorbitado e fora de lugar” estes gatos xa que Fabiola Garcia “conta con funcionarios en postos de libre designación (secretaria xeral, subdirectores, xefes de servizo) que poden desempeñar todo o asesoramento en todas os campos de Política Social”.
Por iso, critica que se gasten os cartos públicos en asesores e non en necesidades “prioritarias” de residencias de maiores e demais centros de asistencia directa que “non están a ser atendidos e seria de primeira necesidade atendelos, para que o persoal poidese facer as súas funcións con protección e seguridade e cun mínimo de dignidade”.
A CiG cita como exemplo o estado dun sillón para descanso dos ordenanzas na quenda de 10 horas de noite na Residencia de Volta do Castro e as goteiras dun dos comedores de residentes asistidos na Residencia de Maiores de Ferrol. “A falta de inversión e compras necesarias é algo común en todos os centros da provincia da Coruña, tendo que aproveitarse dende sabanas e protectores con remendos a maquinaria de cociña, comedor ou lavanderia obsoleta e con averias constantes”, denuncian.
Por iso, este sindicato pídelle á conselleira Fabiola García que reduzca a “cero” o seu persoal de gabinete e destine eses fondos a bens de primeira necesidade nos centros de atención directa de Política Social. Tamén lle piden que use ao “persoal funcionario totalmente preparado e con coñecementos para asesorala, mesmo con total confianza xa que a Secretaria Xeral, os Subdirectores e os Xefes de Servizo que son postos de Libre Designación”.
