Máis de 650 empresas turísticas están adheridas ao bono da Xunta '#QuedamosenGalicia21'
Nesta nova edición produciuse un incremento do 17% no número de aloxamentos e axencias de viaxe que solicitaron a súa participación.
Por E.P. | SANTIAGO DE COMPOSTELA | 10/04/2021 | Actualizada ás 18:08
Un total de 659 aloxamentos turísticos e axencias de viaxes están xa oficialmente adheridos á nova convocatoria do Bono Turístico '#QuedamosenGalicia21', unha iniciativa que a Xunta reedita co obxectivo de seguir apoiando a reactivación do sector.
Esta cifra supón un incremento do 17% no número de empresas adheridas con respecto á primeira edición do Bono Turístico, que contou coa participación de 560 empresas. A previsión é que a cifra final "aínda sexa maior", engaden, xa que o prazo para adherirse ao programa seguirá aberto ata finais de ano e as solicitudes seguen chegando.
As empresas interesadas -aloxamentos turísticos (excepto as vivendas de uso turístico) e as axencias de viaxe inscritas no REAT- teñen que solicitar a súa participación a través da sede electrónica da Xunta. Unha vez aceptado e notificado como establecemento adherido, cada un deles pode publicar as súas ofertas e paquetes turísticos a través de Turespazo na web de Turismo de Galicia.
A oferta do programa irase actualizando neste espazo web de Turismo de Galicia, onde os usuarios poderán coñecer as diferentes propostas nas que empregar o novo bono turístico. A previsión é que os particulares poidan solicitar o seu bono turístico a partir da próxima semana a través da sede electrónica da Xunta, a partir do día seguinte da publicación da convocatoria no Diario Oficial de Galicia.
