Día de percances para os sendeiristas
Sanitarios asisten a unha senderista ferida nun nocello en Malpica e a outra en Folgoso do Courel.
Por Europa Press / Redacción | SANTIAGO DE COMPOSTELA | 17/05/2021 | Actualizada ás 20:49
Unha muller que percorría a senda do Camiño dos Faros, á altura de Malpica, tivo que ser trasladada en ambulancia ata un centro hospitalario despois de resultar ferida nun nocello cando se atopaba nun lugar de difícil acceso; mentres que outra requiriu asistencia médica ao quedar indisposta na ruta da Devesa da Rogueira en Folgoso do Courel.
Segundo informou o 112 Galicia, os primeiros feitos ocorreron sobre as 15,15 horas deste luns, cando unha persoa solicitou asistencia sanitaria para unha senderista que non se podía mover e que se atopaba nunha zona do Camiño dos Faros só accesible a pé ou por aire.
O Centro de Atención ás Emerxencias (CAE) 112 Galicia deu aviso do ocorrido á Garda Civil, ao Grupo de Emerxencias Supramunicipais (GES) en Ponteceso, ao Servizo de Urxencias Sanitarias de Galicia-061, á Policía Local, a Protección Civil e aos Bombeiros de Carballo.
De acordo coas mesmas fontes, finalmente a muller logrou chegar ata un punto no que a esperaba unha ambulancia, para proceder ao seu traslado ao centro hospitalario de referencia.
INDISPOSICIÓN
Doutra banda, o 112 tamén informou de que pasado o mediodía deste luns outra muller tivo que ser rescatada tras sufrir unha indisposición cando practicaba unha ruta de sendeirismo en Folgoso do Courel.
En concreto, un particular alertou do sucedido cando se atopaba na ruta da Devesa da Rogueira, nun tramo ao que non poderían acceder vehículos. Destes feitos avisouse á ambulancia, Garda Civil, Bombeiros de Monforte, o GES de Quiroga e Protección Civil de Folgoso.
Os profesionais sanitarios indicaron que, debido ás dificultades do tramo, a ambulancia esperaría a uns 7 quilómetros de distancia, mentres que membros de Protección Civil procederon a subir o carreiro. No entanto, cando a muller se recuperou o suficiente, con axuda de acompañantes conseguiu baixar o tramo ata atopar aos efectivos.
Unha vez localizada a paciente, foi conducida ata o vehículo dos efectivos de emerxencias, que a continuación a trasladaron ata o punto no que esperaba a ambulancia.
