Xunta e Estado pactan negociar as discrepancias da lei de saúde galega para un pacto á marxe do TC

O vicepresidente primeiro da Xunta, Alfonso Rueda, e o ministro de Política Territorial, Miquel Iceta, asinaron un acordo no que se comprometen a buscar un acordo sobre as discrepancias ao apartado segundo do artigo 38 da lei de saúde galega á marxe do proceso aberto no Tribunal Constitucional, que suspendeu este aspecto normativo.

Concretamente, ambas as partes acordaron constituír un grupo de traballo cos representantes designados por cada parte -hai que lembrar que o Parlamento tamén acordou defender a reforma da lei aprobada na Cámara galega o 25 de febreiro-.

Este grupo de traballo, segundo recolle o acordo, publicado este venres no Diario Oficial de Galicia (DOG) e que recolle Europa Press, ten como misión "alcanzar un acordo extraprocesual respecto das discrepancias manifestadas pola interposición do recurso de inconstitucionalidade" (asunto 1975-2021) en relación ao apartado cinco da reforma da lei galega de saúde, que se corresponde co novo artigo 38.2.

A segunda parte deste acordo, que se asinou no marco da comisión bilateral de cooperación Estado-Xunta con data do 14 de maio, tamén inclúe "designar un grupo de traballo cos representantes que designe cada unha das partes que proceda a desenvolver as negociacións necesarias para tal efecto".

APARTADO CINCO, ARTIGO 38.2

O apartado cinco da reforma da lei galega de saúde introduce un artigo 38 á lei de saúde galega con dous apartados, dos cales, o Consello de Estado avalou que se recorrese a segunda parte, como finalmente fixo o Goberno central, de forma que o Tribunal Constitucional, ao admitir a trámite o recurso, deixou sen efecto este punto. Esta segunda parte fala de medidas preventivas de recoñecemento, tratamento, hospitalización ou control cando haxa un perigo para a saúde da poboación.

E para iso, ademais doutras medidas xerais, establece que se poderán adoptar medidas de control das persoas enfermas, como o illamento domiciliario (actualmente os confinamentos das persoas que están contaxiadas polo coronavirus), o internamento nun centro hospitalario ou o illamento ou internamento noutro lugar adecuado para tal fin.

Entre os sete principais desta segunda parte, tamén recolle medidas de control para persoas que estivesen en contacto con persoas enfermas (como actualmente os illamentos de contactos positivos); ou o sometemento a medidas profilácticas de prevención, incluída a vacinación ou inmunización.

Este apartado da lei tamén habilita medidas de control da "contorna inmediata" das persoas enfermas ou que estivesen en contacto con elas, así como de "zonas afectadas" (lugares xeográficos), o que pode levar, por exemplo, a limitación de mobilidade ou circulación (como foron os peches perimetrais de cidades ou áreas sanitarias) ou restricións ás agrupacións de persoas (como o límite nas reunións, tal e como está vixente neste momento en Galicia).

PONTÓN

Pola súa banda, a portavoz nacional do BNG, Ana Pontón, considera que o presidente da Xunta, Alberto Núñez Feijóo, "recoñece" que a lei galega de saúde ten "problemas de legalidade" tras o acordo alcanzado co Goberno central para negociar as discrepancias ao redor da norma á marxe do proceso aberto no Tribunal Constitucional.

Así, ao ser preguntada pola prensa respecto diso tras reunirse con representantes sindicais da área sanitaria de Santiago-Barbanza, a líder da oposición dixo descoñecer "exactamente" os termos dese acordo, pero si valorou que Feijóo "recoñece" que a modificación normativa aprobada no Parlamento ten "problemas de legalidade".

"A pandemia, para poder enfrontala, necesítase mellorar o sistema sanitario público e non unha lei que, basicamente, o que quería era sancionar aos galegos e recortar dereitos e liberdades", criticou.

PSDEG

Ao mesmo tempo, o deputado socialista no Parlamento galego, Pablo Arangüena, mostrou a súa confianza en que o grupo de traballo pactado entre Xunta e Goberno central para abordar as discrepancias sobre a Lei galega de Saúde alcance acordos, pero considera que o texto debe sufrir "cambios". A configuración deste órgano bilateral proba, para Arangüena, que "a lei ten problemas" porque "limita e regula dereitos fundamentais", algo que unha comunidade autónoma "non pode" levar a cabo.

O viceportavoz parlamentario dos socialistas no Pazo do Hórreo incidiu na importancia de "sentar e tratar de resolver e modificar os problemas" que, ao seu xuízo, ten unha lei que, como lembrou, "é a única de España que foi recorrida ante o Constitucional" polo Goberno central.