O presidente de Portugal percorrerá unha etapa do Camiño para apoiar o Xacobeo

O titular do Goberno galego, Alberto Núñez Feijóo, abordou a oportunidade que supón o Xacobeo 21-22 para reactivar o turismo e a economía de Galicia e Portugal co presidente da República lusa, Marcelo Rebelo de Sousa, quen fará unha etapa do Camiño no mes de agosto.

Na reunión mantida este xoves en Lisboa, Feijóo expuxo que tanto o Camiño Portugués do Interior como o da Costa experimentan o maior crecemento de peregrinos, como xa se puxo de manifesto en 2019. Ademais, resaltou o patrimonio histórico, a gastronomía e a paisaxe como elementos crave destas rutas.

Nesta liña, o responsable do Goberno galego agradeceu a decisión de Marcelo Rebelo de Sousa de facer unha etapa da Ruta Xacobea como peregrino no mes de agosto. "Aínda que xa fixo o Camiño en dúas ocasións, estamos máis que satisfeitos ante o compromiso do presidente da República e poder contar así cun peregrino especial", abundou.

No ámbito económico, ademais do apoio do presidente portugués ao Eixo Atlántico ferroviario e o seu compromiso para a conexión O Porto-Vigo, ambos os mandatarios avaliaron as posibilidades que brindan os fondos europeos Next Generation para relanzar a situación económica.

Respecto diso, o titular da Xunta fixo referencia aos máis de 300 proxectos que conforman a candidatura de Galicia, por un importe de 20.000 millóns, incidindo nos que poden resultar "interesantes" para a Eurorrexión Galicia-Norte de Portugal, como a iniciativa presentada no ámbito da automoción.

Na súa intervención e tras destacar que a mortalidade pola covid-19 en Galicia foi a "máis baixa" de todas as comunidades autónomas españolas, Feijóo tamén destacou que a situación da pandemia permitirá recuperar a "relación de veciñanza, económica e social" entre Galicia e Portugal, especialmente nas zonas fronteirizas das provincias de Ourense e Pontevedra.

"Hai máis de 70.000 persoas que cruzan a fronteira diariamente", destacou Feijóo, que celebrou que, tras "pasalo mal durante o peche das fronteiras", se vaia "recuperar" as relacións "económicas, sociais e de veciñanza" entre ambos os territorios.