O TSXG tomba o decreto da Xunta que pedía presentar o certificado covid para acceder a locais hostaleiros

O Tribunal Superior de Xustiza de Galicia (TSXG) decretou que a obrigación de presentar un certificado covid-19 para acceder ao interior de establecementos hostaleiros e locais de lecer nocturno en concellos con máis elevada incidencia do virus carece de vixencia ao non ser autorizada xudicialmente.

Apertura do lecer nocturno en Vigo / MARTA VÁZQUEZ - EUROPA PRESS. / Europa Press

Os maxistrados explican en dous autos notificados este xoves que a Xunta só enviou ao TSXG para someter a autorización a orde de 21 de xullo, na que se establecían medidas de prevención fronte ao virus, entre elas limitacións nas reunións, pero non a orde de 22 de xullo, que contiña o requirimento de presentar o certificado covid en establecementos de hostalaría e restauración.

En ambos os autos xudiciais, que foron notificados ás partes na mañá deste xoves, segundo confirmou o TSXG, a sección terceira da Sala do Contencioso-Administrativo resolve senllos recursos presentados pola Asociación Liberum e por titulares de establecementos de hostalaría, restauración e lecer nocturno de Santiago de Compostela.

Ambos denegan as medidas cautelarísimas que solicitaran para que se anulase esa obriga imposta polo Goberno que dirixe Alberto Núñez Feijóo o pasado mes de xullo --no caso da hostalaría, nos concellos de maior incidencia pedíase certificado covid, de pasar a enfermidade ou PCR negativa (a esixencia é xeral para o lecer nocturno, pechado en interiores nos niveis máis altos)--.

O argumento xudicial que se dá para denegar a petición é que a medida que instan suspender xa carece de vixencia en Galicia ao non ser autorizada polo TSXG.

FEIJÓO DEFENDEU QUE NON TIÑA DÚBIDAS XURÍDICAS

Esta é a primeira vez que o alto tribunal tomba unha medida anticovid establecida polo Executivo galego. De feito, Feijóo aseguraba moi recentemente, tras defendelo no cume de presidentes de Salamanca, analizar o uso desta vía para o conxunto do Estado, que non tiña dúbidas xurídicas sobre esta obriga do certificado para acceder á hostalaría en Galicia.

"Nós consultamos coa Asesoría Xurídica e entendemos que a lei xeral de sanidade e, ademais, a lei de pandemias galega, posibilitan que adoptemos esa decisión sen un amparo xudicial previo", sentenciou, nunha entrevista concedida a Europa Press, na que insistiu en que esta era a vía máis efectiva para que os locais nas zonas en peor situación puidesen seguir abertos.

De feito, dirixentes da Xunta sostiveron de forma reiterada que era a "única" vía para que os locais seguisen abertos nun contexto de incidencia elevada da covid-19, no marco da quinta onda da epidemia. 

"ANÓMALO PROCEDER DA XUNTA"

Previamente, a semana pasada o TSXG ditou outro auto no que denegaba tamén unha medida cautelarísima de anulación do certificado solicitada neste caso por Lugo Monumental. Non entraba no fondo do asunto, pero si subliñaba o "evidente fundamento" sanitario das restricións acordadas polo Goberno galego.

Con todo, nos autos deste xoves, os maxistrados aluden a que o "anómalo proceder por parte da Xunta induciu a confusión" e explican que na resolución emitida a semana pasada "non se fixo mención algunha ás razóns que se expoñen nos presentes autos ao dar por sentado que as medidas cuxa suspensión se instaba foran sometidas a previa autorización polo TSXG".

Nese auto, de data 6 de agosto, remarcan que non se avalou o requirimento imposto polo Goberno galego, senón que, dado que a tramitación das medidas cautelarísimas supón que non se dea traslado do recurso á Xunta, o tribunal acordou, co obxectivo "de non furtar á Administración a posibilidade de facer alegacións", que se continuase a tramitación do procedemento como unha peza ordinaria de medidas cautelares.

É dicir, engaden que a postura que se expresou é que, unha vez que o Goberno galego tivese posibilidade de xustificar a adopción da medida fronte ao recurso interposto polos hostaleiros, o TSXG tomaría unha decisión sobre a súa procedencia.

Nos fundamentos xurídicos deste venres, ademais, os maxistrados do TSXG aluden á sentenza de maio do Tribunal Supremo, que estableceu que as medidas limitativas de dereitos fundamentais non fornecen efectos nin son aplicables mentres non sexan ratificadas xudicialmente.