O operativo galego subministrou 86.800 litros de auga para a extinción do lume de Ávila

A Consellería de Medio Rural desprazou na medianoite do domingo catro brigadas, dous axentes, un técnico e dúas motobombas pertencentes ao Servizo de prevención e defensa contra os incendios forestais (SPIF) de Galicia para colaborar na extinción do lume que afecta distintas localidades de Ávila.

A Axencia Galega de Emerxencias (Axega) achegou un camión cisterna que se encargou de abastecer de auga as motobombas, uns 86.800 litros de auga tanto a medios do SPIF como a dispositivos de intervención doutras comunidades.

Este operativo galego foi mobilizado para tentar controlar o lume nas localidades de Navalmoral e Navalacruz, sendo este último o punto onde se orixinou o incendio o pasado sábado.

Ao longo de dúas xornadas, os efectivos actuaron en distintos puntos quentes do incendio e chegaron a atallar un dos focos tras ser alertado por veciños da zona.