No medio da tensión social polo seu emprego, os profesores serán enquisados para mellorar o funcionamento do E-Dixgal

A Consellería de Educación, Ciencia, Universidades e FP lanzou unha enquisa entre o profesorado que emprega o programa E-Dixgal co obxectivo de revisar e actualizar este proxecto de cara a reforzar o modelo híbrido de ensinos, no que as metodoloxías de aprendizaxe tradicionais combínanse e compleméntanse cos novos desafíos dixitais. Tal e como informou o departamento que dirixe Román Rodríguez nun comunicado, a enquisa está dirixida aos docentes de todos os niveis educativos que imparten algunha materia a través de E-Dixgal, e poderán cubrila 'en liña' a través do seu correo electrónico entre este luns e o venres desta semana.

Trátase dun cuestionario para avaliar o funcionamento do programa desde a perspectiva do profesorado e, por iso, faise fincapé en aspectos como os medios técnicos e servizos do proxecto (facilidade de uso, funcionamento da interface, dificultades técnicas...), calidade dos contidos, formación e asesoramento ou tempo de uso, entre outros. Así mesmo, os docentes poderán responder a cuestións sobre a motivación dos estudantes, a mellora ou non da súa competencia dixital e formación, a repercusión no alumnado con necesidades educativas ou os procesos de avaliación.

O obxectivo da Consellería é recompilar o maior número de datos obxectivos co fin de enriquecer o procedemento de revisión e actualización deste programa aos novos contextos, baseado en evidencias científicas e froito do diálogo entre o conxunto da comunidade educativa. Precisamente, en aras dese consenso, a revisión xa foi abordada no último Consello Escolar de Galicia e mantivéronse reunións de traballo con representantes das anpas e das direccións dos centros educativos. A Xunta lembrou que o programa E-Dixgal é unha ferramenta máis, voluntaria por parte dos centros educativos, dentro do amplo abanico de accións dispoñibles ao amparo da Estratexia de educación dixital 2030.

Despois de máis de dez anos de funcionamento, ao longo dos cales se foron mellorando aspectos relativos á formación do profesorado e aos contidos, entre outros, a Xunta considera que fai falta reformular o modelo para garantir un correcto equilibrio na adquisición das competencias do alumnado, así como na igualdade de oportunidades nun mundo cada vez máis tecnificado. En concreto, recentemente, Anpas Galegas presentou un estudo propio no que sinalaban que un 70 % das familias rexeitaba continuar con este programa. Ademais, as familias do CEIP Lamas de Abade de Santiago de Compostela reuniron máis de 400 firmas contra o emprego deste programa.

Centro educativo adherido ao Proxecto E-DIXGAL | Fonte: Arquivo