Miñones anima aos alcaldes das cidades galegas a sumarse ao plan estatal de mobilidade
Sánchez Bugallo xa adiantou as súas propostas para un plan orientado a reducir as emisións nas cidades.
Por E.P. | SANTIAGO DE COMPOSTELA | 03/09/2021 | Actualizada ás 17:24
O delegado do Goberno en Galicia, José Miñones, animou ás alcaldesas e alcaldes das cidades galegas a sumarse ao Plan de Recuperación, Transformación e Resiliencia do Goberno de España, a través da convocatoria para unha mobilidade sustentable.
Fíxoo tras unha unha reunión con rexedores socialistas, na Delegación do Goberno, e na Miñones trasladou unha mensaxe de colaboración aos concellos galegos para axudarlles a competir para a captación dos fondos do Mecanismo Europeo de Recuperación. "Un reto e unha oportunidade única que Galicia, e os concellos, deben aproveitar", sostivo.
O delegado do Goberno en Galicia fíxoo tras a reunión coas alcaldesas da Coruña, Inés Rey, e Lugo, Lara Méndez, e cos alcaldes de Santiago de Compostela, Xosé Bugallo, e de Ferrol, Anxo Mato, cos que analizou a convocatoria que mantén aberta o Ministerio de Transportes, Mobilidade e Axenda Urbana (Mitma) para subvencionar unha mobilidade sustentable e modernizar os servizos de transporte público.
"A primeira reunión de moitas que en distintos formatos manteremos nos próximos meses para lograr o obxectivo de seguir facendo grandes cidades, cidades modernas e sustentables", explicou o delegado do Goberno, que lembrou que esta liña de axudas está dotada con mil millóns de euros e cun prazo de presentación de solicitudes que termina o 30 de setembro.
Con este investimento, o Goberno impulsará nas cidades as zonas de baixas emisións (ZBE), a transformación sustentable do transporte público colectivo e a dixitalización da mobilidade. "O Goberno vai financiar todas estas actuacións para transformar as cidades, loitar contra o cambio climático e facer a vida máis sinxela aos galegos e galegas", apuntou.
