A CIG vincula a paralización da produción dun forno de Ferroatlántica en Sabón ao prezo da luz
O sindicato pide á empresa "que non utilice o custo da electricidade como xustificación para destruír empregos e deslocalizar a produción".
Por Europa Press / Redacción | A CORUÑA | 13/09/2021 | Actualizada ás 18:59
A CIG denunciou a comunicación por parte de Ferroatlántica da intención de paralizar un forno na fábrica de Sabón "e que probablemente derivará a produción a outras plantas que o grupo ten fóra do Estado español porque considera insustentable o actual prezo da enerxía".
Nun comunicado, a sección sindical reclama á empresa "que non utilice o custo da electricidade como xustificación para destruír empregos e deslocalizar a produción, tendo en conta a rendibilidade que está a obter pola boa situación do mercado de silicio e que saca a materia prima de minas galegas como a de cuarzo de Serrabal".
"O crecemento da demanda e a subida do prezo do silicio no mercado auguraban que este sería o ano da recuperación para a fábrica de Sabón". "De feito, a empresa comezou 2021 arrincando o forno 3 e logrando beneficios no primeiro trimestre", argumenta a CIG.
Con todo, engade que, agora, "a causa da imparable alza no prezo da electricidade, a dirección decidiu paralizar a actividade dun forno e xa advertiu que probablemente derive a produción de Sabón a outras plantas. Esta medida implica, ademais, o despedimento do persoal eventual e do persoal das empresas auxiliar pola falta de carga de traballo", apostila.
Neste contexto, a CIG reclama aos gobernos central e autonómico "medidas urxentes para pór en marcha unha tarifa industrial máis xusta, competitiva e predicible que remate coa permanente ameaza á continuidade produtiva e aos empregos no sector electrointensivo".
