Por Europa Press / Redacción | SANTIAGO DE COMPOSTELA | 22/10/2021 | Actualizada ás 18:12
O BNG levará ao Congreso dos Deputados unha emenda aos Orzamentos Xerais do Estado (PGE) de 2022 para baixar o IVE dos salóns de beleza e as barbarías ata o tipo reducido do 10%. Así o avanzou o representante do Bloque na Cámara Baixa, Néstor Rego, tras manter un encontro con membros da Plataforma Crer en Nós, que engloba ao sector da imaxe persoal, xunto á dipuada autonómica Carmela González.
Será o segundo ano consecutivo que, durante a tramitación dos orzamentos estatais, o BNG reclamará a baixada do IVE ao 10% en barbarías, barberías e centros de estética, xa que o ano pasado a proposta non saíu adiante.
"O sector está a pagar neste momento as consecuencias dunha decisión inxusta e o cambio de posición de PP e PSOE segundo gobernasen ou non", asegurou Rego, á vez que lembrou que en 2012 o IVE do sector pasou do 8% ao 21%.
"As perruqueiras e perruqueiros están a cumprir cunha importante función social, pois, ademais da estética, tamén se encargan de atender as necesidades de moitas persoas dependentes e mesmo de avanzada idade que previsan asear o seu pelo. Non é vaidade, é hixiene", sentenciou.
Neste contexto, Carmela González lembrou que hai xa varias iniciativas aprobadas no Parlamento galego para instar o Goberno estatal a reducir este imposto ao sector, algo que serviría como "axuda directa" para uns establecementos que nos peores momentos da pandemia víronse obrigados a pechar.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.