Rescatada unha persoa do interior dun turismo que envorcou en Dumbría
Unha ambulancia trasladou á ferida ao Hospital Virxe da Xunqueira de Cee.
Por E.P. | SANTIAGO DE COMPOSTELA | 02/11/2021 | Actualizada ás 10:22
Unha persoa foi rescatada na mañá deste martes do interior do coche que manexaba e co cal sufriu unha saída de vía e quedou envorcado no municipio coruñés de Dumbría.
Segundo informou o 112 Galicia, sobre as 8,30 horas unha testemuña do sinistro contactou co servizo de emerxencias para informar de que un vehículo permanecía envorcado na estrada AC-552, no punto quilométrico 81, e que a persoa que o conducía estaba atrapada dentro do mesmo. Por iso, os xestores do CIAE-112 comunicáronllo aos Bombeiros de Cee, a Urxencias Sanitarias de Galicia-061, á Garda Civil de Tráfico e aos membros de Protección Civil.
No punto, os bombeiros indicáronlle ao 112 que tiveron que cortar o parabrisas do turismo para poder sacar á persoa do seu interior e que fora atendida polo persoal sanitario.
Ao lugar o 061 desprazou unha ambulancia de soporte vital básico e un equipo sanitario de Atención Primaria para atender a unha persoa que foi levada ao Hospital Virxe da Xunqueira de Cee, confirmaron a Europa Press fontes sanitarias.
OUTRO COCHE ENVORCADO
Tamén no concello pontevedrés de Oia un condutor tivo que ser trasladado despois de ter un accidente na estrada PO-552, en Viladesuso, ao envorcar o seu vehículo. Segundo a información facilitada polo particular que chamou ao 112 Galiciam ás 22,00 horas deste pasado luns un coche saíuse da vía e quedou envorcado dentro dunha leira particular.
Por parte do 112 notificáronselle os datos aos servizos médicos, á Garda Civil de Tráfico, aos Bombeiros do Porriño e de Vigo e aos membros do GES da Guarda, que confirmaron que a persoa non estaba atrapada no turismo e foi trasladada a un centro sanitario.
O 061 mobilizou unha ambulancia de soporte vital básico que levou ao home ferido, I.S.P., de 31 anos de idade, ao Hospital Álvaro Cunqueiro de Vigo.
