Ricardo Varela avisa a Caballero: "O PSdeG sae unido e co respaldo do 80% dos militantes"

O novo presidente do Comité de Ética do PSdeG e ex conselleiro de Traballo, o lucense Ricardo Varela, asegurou este xoves que o partido "sae unido" tras o congreso celebrado este mércores e martes en Santiago que levou ao liderado ao presidente da Deputación da Coruña, Valentín González Formoso.

Preguntado polas voces "críticas" da contorna do secretario saínte, Gonzalo Caballero, Varela limitouse a destacar que "os socialistas e o partido sae unido". "Non é un dato menor que a comisión executiva, a pesar deses problemas, salga cun respaldo do 80 por cento dos militantes", apostilou.

"Esa é unha forza moi grande que se lle dá á dirección do partido e a Valentín  para que faga un traballo frutífero nos próximos tempos, que o partido o necesita porque viviu tempos convulsos", reflexionou. En canto á súa nova responsabilidade, Ricardo Varela precisou que "o comité de ética é un órgano que vela polo cumprimento das leis internas do partido; estatutos, regulamentos ou as resolucións dos congresos".

O novo presidente do Comité de Ética do PSdG, Ricardo Varela

INÉS REY

A alcaldesa da Coruña, Inés Rey, manifestou, tras o congreso do PSdeG celebrado este martes e mércores, que agora toca "traballar" para ofrecer unha "alternativa de goberno" e dar "resposta aos galegos". Este obxectivo marcou para todos os militantes "con independencia da posición" que ocupen, dixo ao ser preguntada polo exsecretario xeral, Gonzalo Caballero.

A preguntas dos xornalistas, na rolda de prensa que ofreceu sobre a Xunta de Goberno local, cualificou de "ilusionante" esta nova etapa e resaltou o respaldo ao novo secretario xeral do PSdeG, Valentín González Formoso.

CABALLERO SEGUIRÁ COMO DEPUTADO

O exsecretario xeral do PSdeG Gonzalo Caballero deixou en mans da nova dirección do partido nomear ao portavoz dos socialistas na Cámara galega, na que asegura que continuará como deputado. Faino despois de que o partido cambiara os estatutos para poder depoñelo libremente da portavocía dende a executiva.

O político vigués pronunciouse deste xeito ao ser preguntado este xoves no Pazo do Hórreo sobre o seu futuro como portavoz tras a celebración do XIV Congreso Nacional do PSdeG, no que Valentín González Formoso foi ratificado como novo secretario xeral e no que se elixiu á executiva que pilotará a formación o próximos catro anos.

Na súa intervención, Gonzalo Caballero asegurou que a súa "responsabilidade" cos galegos e galegas é "ser deputado ao longo desta lexislatura" e sostivo que é "un home de partido", que "ten criterio pero tamén lealdade". "Vou traballar desde o Parlamento polos galegos e correspóndelle á dirección nova tomar as decisións que corresponden en relación á portavocía", dixo.

Neste punto, sinalou que este venres será o encargado de formular a pregunta ao presidente da Xunta, Alberto Núñez Feijóo, na sesión de control tendo en conta que "non hai outro escenario posible". "Mañá corresponderame facer a pregunta ao presidente porque son portavoz do Grupo Socialista e, ata que a dirección do partido faga unha proposta doutro portavoz, correspóndenos a cada un saber onde temos que estar. E a min correspóndeme estar no Parlamento de Galicia neste momento sendo portavoz e facendo oposición", sinalou.

Cuestionado sobre se considera que houbo integración no Congreso, limitouse a desexar "todos os éxitos" á nova dirección. "Son un militante comprometido, que sempre traballei pola esquerda e o socialismo en Galicia alí onde tiña que estar, vouno a seguir facendo e desexo que a nova dirección teña todos os acertos para ter un partido socialista forte e seguir avanzando do mesmo xeito que avanzamos no últimos catro anos", apuntou.

Ademais, lamentou que se que se considere que traslada unha imaxe de división. "Os medios pregúntanme moitas cuestións e se logo respondo a moitas cuestións o que penso, están a dicir que teño unha formulación de non asumir os resultados ou que coa miña visión non estou a facilitar a solución para o partido", apuntou.

"É unha situación na que eu quero dar todo tipo de respostas pero se vostedes queren que diga o que penso, tamén se poden xerar escenarios nos que vostedes expoñen que traslado unha imaxe de división e, por tanto, teño que ser responsable, como o fun sempre, e correspóndelle á nova dirección acertar e ter todos os éxitos", sostivo.

REXEITA ACUDIR Á XUSTIZA

Despois de que durante a celebración do congreso denunciase que se impedía a pluralidade e a democracia interna no partido ao non permitir que os seus afíns presentasen listas para os órganos nacionais e federais do partido, descartou levar á vía xudicial o asunto. "Non estou nese escenario", deixou claro ao ser preguntado sobre se os seus presentarán un recurso nos tribunais. "Sei que algúns delegados presentaron algún tipo de escritos ante a comisión electoral e, a partir de aí, terán que tomar as decisións que corresponda", sinalo