A RAG e o Concello de Sada celebran a declaración BIC da biblioteca Emilia Pardo Bazán
O Concello aplaude a medida pero demanda á Xunta que abandone a "pasividade" respecto da ampliación do Decreto BIC do Pazo.
Por Europa Press / Redacción | A CORUÑA | 28/01/2022 | Actualizada ás 17:55
A Real Academia Galega (RAG) e o Concello de Sada celebran a declaración como ben de interese cultural (BIC) da biblioteca de Emilia Pardo Bazán. Nun comunicado, a institución académica cualifica a decisión de "elemental xustiza histórica que debería permitir no futuro contemplar unido un patrimonio bibliográfico singular de todos os galegos e galegas."
Faino despois de que o Consello da Xunta aprobase o decreto que protexe o conxunto dos libros que pertenceron á escritora coruñesa, co que culmina o proceso que se puxo en marcha a partir da solicitude presentada a finais do ano 2020 pola RAG, que conserva preto dos 8.000 títulos que o compoñen.
A protección alcanza tamén os case 3.000 volumes que permanecen nas Torres de Meirás (Sada), a residencia de verán de Pardo Bazán, que pasou a mans do ditador Francisco Franco en 1938 e que agora é, de forma provisional, patrimonio do Estado.
Pola súa banda, o Concello de Sada aplaude a medida, pero subliña que "segue sen haber novidades respecto da ampliación do Decreto BIC do Pazo". Respecto diso, denuncia "pasividade" da Xunta, "dado que os bens mobles do pazo seguen en perigo".
