O Museo das Peregrinacións expón unha obra do pintor gótico Martín Bernat cedida polo Museo do Prado

O Museo das Peregrinacións e de Santiago expón a obra do pintor gótico Martín Bernat 'Embarque en Jafa del cuerpo de Santiago el Mayor', cedida polo Museo Nacional do Prado, ata finais do ano 2023.

A obra móstrase conxuntamente con 'Huída de Teodoro y Atanasio' e 'La reina Lupa viendo pasar el cuerpo del Apóstol Santiago'. Ambas son óleos sobre táboas do século XVI, pertencentes á escola aragonesa, que nunca antes foran expostos.

Nun comunicado, a Xunta explicou que a cesión por parte do Museo Nacional do Prado prodúcese "en contraprestación polo levantamento do depósito da obra 'Santiago Peregrino', de Juan de Flandes" para expola durante dous anos nas salas de Gótico do centro madrileño, con motivo da súa remodelación. Así, transcorrido ese período, "a peza regresará a Compostela e o Museo Nacional do Prado recuperará tamén a táboa de Martín Bernat agora cedida".

O conselleiro de Cultura e Educación, Román Rodríguez, visitou este domingo o Museo das Peregrinacións para "contemplar" a táboa do século XV, que está situada na zona dedicada á 'translatio', que foi remodelada "para acoller esta peza" e outras dúas da colección do Museo das Peregrinacións que nunca foran exhibidas.

Román Rodríguez contempla a obra 'Embarque en Jafa do corpo de Santiago o Maior' no Museo das Peregrinacións. XUNTA DE GALICIA | Fonte: Europa Press