Preacordo entre os sindicatos e a patronal das residencias privadas de maiores
Deberá someterse a votación das traballadoras nunha asemblea que terá lugar o luns.
Por E.P. | SANTIAGO DE COMPOSTELA | 25/03/2022 | Actualizada ás 13:17
Organizacións sindicais e patronal das residencias da terceira idade e centros de día privados de Galicia alcanzaron este venres un preacordo para suspender a folga, tras 10 horas de negociación coa mediación do Consello Galego de Relacións Laborais, ao que os traballadores pediron a súa intervención esta semana.
Este preacordo, que recolle algunhas das melloras salariais reclamadas polo sector, así como avances no convenio colectivo, deberá someterse a votación das traballadoras nunha asemblea que terá lugar o luns, día 28, ás 17,00 horas, no edificio Cersia de Santiago.
As traballadoras destas residencias iniciaron esta semana unha folga para protestar polas condicións laborais, salariais e a falta de convenio nos centros de titularidade privada. Os sindicatos recorreron os servizos mínimos fixados pola Xunta para este paro e que, na práctica, mantiña os cocientes habituais de traballadores.
Entre as reclamacións estaba a negociación dun novo convenio colectivo, que reclaman desde hai máis de dous anos, así como a actualización dos salarios ao 6,5% do IPC que, denuncian, as empresas xestoras recibiron por parte das achegas da Xunta e subindo cotas aos internos, pero que non trasladaron aos empregados.
En concreto, en palabras de Transi Fernández, da CIG, en xaneiro deste ano as empresas comunicaron ás familias dos usuarios "subidas de ata 80 euros mensuais" a causa do IPC, que tamén tivo reflexo nas transferencias da Xunta, pero non nos salarios. "É repugnante, está a xogarse co diñeiro dos traballadores e dos usuarios", dixo a representante da CIG.
Ademais da cuestión salarial, os sindicalistas reclaman que se actualicen e incrementen os cadros de persoal, que manteñen unha diferenza importante con respecto ás residencias públicas, o que repercute na calidade asistencial.
A inicios de semana, os sindicatos puxéronse en contacto coa Xunta para solicitar a intermediación do Consello Galego de Relacións Laborais no conflito. Este órgano aceptou exercer este papel e convocou ás partes a unha reunión este venres, na que finalmente se alcanzou un preacordo.
