O Tribunal Superior anula o acordo do Consello da Xunta sobre o proxecto da Vía Ártabra
Por Europa Press / Redacción | A Coruña | 29/03/2022 | Actualizada ás 16:55
O Tribunal Superior de Xustiza de Galicia (TSXG) estimou o recurso contencioso-administrativo interposto polo Concello de Cambre contra o acordo do Consello da Xunta polo que se aprobou o expediente de información pública e definitivamente o proxecto de construción da Vía Ártabra.
Mediante esta resolución, anula o citado acordo, de data 5 de decembro de 2018, segundo informa o alto tribunal galego sobre o contido do fallo.
Esta resolución complementa a dada a coñecer a semana pasada, cando a mesma Sala estimou outro recurso interposto tamén polo Concello e que anulou a resolución de 27 de marzo de 2009 da Consellería de Infraestruturas e Vivenda.
Mediante a mesma, facíase pública a aprobación definitiva do proxecto de trazado e estudo de impacto ambiental da obra da Vía Ártabra, tramo AC-221, no polígono de Cambre.
Respecto diso, o alto tribunal precisa que "ao tratarse de dous actos administrativos diferentes, a Sala tivo que pronunciarse en dúas ocasións, aínda que o tramo ao que se refiren as sentenzas é o mesmo".
