Galicia suma máis parados de longa duración que Austria, un 26,4%
Crecen un 20,6% os accidentes laborais, ata 62,5 sinistros por cada 10.000 ocupados.
Por Europa Press / Redacción | SANTIAGO DE COMPOSTELA | 07/04/2022 | Actualizada ás 10:15
España aglutina ao 30% dos parados de longa duración de toda Europa (912.000 persoas). Esas persoas supoñen á súa vez o 27% do total de parados españois, tres puntos porcentuais máis que ao final de 2020 e a maior proporción nun ano e medio.
En Galicia, os parados de longa duración son 39.700 persoas, o 26,4% do total de desempregados (+2,1 puntos). Comparando o dato galego cos países da Unión Europea, este 26,4% supera en máis de seis puntos porcentuais a media da UE-27, que se sitúa nun 20,2%. Suecia (6,7%) e Dinamarca (7,6%) destacan por ter os resultados máis favorables, 20 puntos menos que o caso galego.
En termos absolutos, Galicia suma, por si soa, máis parados de longa duración que Austria, a pesar de que este país ten unha poboación case catro veces maior que a da autonomía.
O incremento do número de parados de longa duración reduce a cantidade de beneficiarios da prestación de desemprego. En Galicia, a porcentaxe de cobertura diminuíu ata o 77,5% (5,6 punto menos que hai un ano). Supón o terceiro maior dato autonómico.
EMPREGO DE ALTA CUALIDADE
Por outra banda, o 95% dos empregos creados en Galicia no último ano son de alta cualificación, maior taxa desde que hai rexistros, segundo un estudo de Monitor Adecco de Oportunidades e Satisfacción no Emprego.
Esta situación permitiu aumentar a proporción dos empregos de alta cualificación en 1,3 puntos, ata supor o 33,1% do total. Así, xeráronse 9.900 ocupacións de alta cualificación (+2,8%) e 500 de media ou baixa (+0,1%).
En Galicia, un 8,7% dos ocupados (fronte ao 9,3% estatal) traballa menos tempo que a xornada completa e quere e está dispoñible para traballar máis horas, pero non atopa onde facelo. Esta porcentaxe creceu 0,6 puntos porcentuais no último ano.
SINISTRALIDADE EN AUMENTO
A sinistralidade laboral, que tivo un marcado descenso durante 2020 como consecuencia das diferentes restricións á actividade económica, volveu a aumentar agora. En Galicia creceu un 20,6%, ata 62,5 accidentes por cada 10.000 ocupados.
De feito, é unha do catro autonomías nas que o número de accidentes de traballo aumentou máis do 20% interanual. No entanto, o seu nivel de sinistralidade mantense por baixo da media estatal (63,7 accidentes).
