A Xunta amplía ata 4,7 millóns as axudas ao lecer nocturno polos peches de Fin de Ano

A Xunta de Galicia ampliará ata os 4,7 millóns de euros as axudas extraordinarias dirixidas aos titulares dos negocios de lecer nocturno que optaron por pechar os seus establecementos a pasada noite de Fin de Ano, co obxectivo de poder atender a todas as peticións que cumpren os requisitos establecidos.

Nun comunicado, a Consellería de Emprego e Igualdade indicou que engadirá 1,2 millóns de euros á partida inicial prevista de 3,5 millóns, co obxectivo de compensar as perdas nas que estes establecementos incorreron por mor de pechar a noite do 31 de decembro para evitar unha maior propagación do coronavirus.

A Xunta lembrou que teñen dereito a acceder a estas axudas as empresas de lecer nocturno que comunicaron previamente a súa decisión de suspender a súa actividade entre as 00,00 horas do 31 de decembro e as 03,00 horas do 3 de xaneiro, conforme ao establecido na orde da Consellería de Sanidade.

As contías acordadas varían en función da superficie dos establecementos, partindo dos 2.500 euros se teñen menos de 100 metros cadrados e ata os 45.000 euros para os grandes establecementos de máis de 2.000 metros cadrados.

Ata este martes case 480 empresas xa recibiron ditas subvencións, pero a Xunta estima que se superarán as 600 compañías beneficiarias, entre discotecas, pubs, cafés-espectáculo e salas de festas e de concertos. Estas axudas son financiadas con fondos europeos como parte da resposta da Unión Europea á pandemia.

A Sala Pelícano durante a realización dunha proba piloto da reapertura do lecer nocturno, a 12 de xuño de 2021, na Coruña. M. Dylan - Europa Press