A Xunta deberá restaurar o pazo de Lourizán ao non recorrer a sentenza do TSXG que obrigaba a rehabilitalo
A presidenta da Deputación de Pontevedra, Carmela Silva, mostrou a súa satisfacción pola decisión ao afirmar que "os convenios teñen rango de norma e hai que cumprilos".
Por E.P. | PONTEVEDRA | 05/05/2022 | Actualizada ás 16:43
A sentenza do Tribunal Superior de Xustiza de Galicia (TSXG) que condena á Xunta a realizar as obras de rehabilitación e mantemento do Pazo de Montero Ríos, en Lourizán, xa é firme despois de que o Goberno galego non recorrese a decisión xudicial emitida o pasado mes de febreiro pola sala do Contencioso Administrativo.
Esta decisión xudicial do alto tribunal galego dálle á Consellería de Medio Ambiente, Territorio e Vivenda un prazo de dez días para que "leve a puro e debido efecto" a súa decisión, en cumprimento dos contidos da sentenza pola que foi condenada a executar as obrigacións derivadas do convenio asinado en 1991 coa Deputación sobre a restauración e mantemento desta xoia do patrimonio civil de Galicia, declarada como Ben de Interese Cultural (BIC).
A presidenta da Deputación de Pontevedra, Carmela Silva, mostrou a súa satisfacción pola decisión ao afirmar que "os convenios teñen rango de norma e hai que cumprilos". A mandataria provincial incidiu que o contido do acordo deixaba ben claro que era a Xunta a que debía asumir os labores de rehabilitación e mantemento deste Pazo "precioso e extraordinario".
Carmela Silva pediu á Xunta que achegue os recursos necesarios, que nun primeiro momento cifraran en 14 millóns de euros, pero que coa deterioración actual e o paso do tempo serán "uns 20 millóns, pero a Xunta ten capacidade e será unha gran noticia", concluíu a presidenta.
