Piden retirar dunha exposición da Coruña obxectos do ex alcalde e militar franquista Peñamaría de Llano

A Comisión pola Recuperación da Memoria Histórica (CRMH) solicitou ao Ministerio de Defensa a retirada, dentro da exposición do Museo Militar da Coruña, dos obxectos referidos a Sergio Peñamaría de Llano.

Nun comunicado remitido aos medios, a entidade mostrou o seu desacordo con que se expoñan nas vitrinas do Museo Histórico Militar da Coruña os obxectos doados pola familia de Sergio Peñamaría de Llano, como o uniforme, pistola, banda e medallas, sen ningún tipo de aclaración nin contextualización histórica.

Conforme sinala a comisión, Peñamaría de Llano, militar e alcalde da Coruña nos anos 50 participou na posguerra na represión física na comarca de Valdeorras como tenente ao mando do I Terzo de III Bandeira da Lexión. Así mesmo, a partir dos anos 40, formou parte como fiscal nos consellos de guerra realizados na ditadura, solicitando penas de morte en procesos realizados sen ningún tipo de garantías xurídicas.

Por este motivo, o presidente e varios representantes da CRMH compareceron este martes na Delegación do Ministerio de Defensa en Galicia para rexistrar unha solicitude reclamando a retirada de calquera obxecto referido a este militar, ao considerar que non reúne as condicións militares nin morais para figurar como personaxe representativo da historia desta cidade en tempos dunha cruel ditadura.

Sergio Peñamaría de Llano, ex militar e alcalde franquista da Coruña | Fonte: FB Concello A Coruña