Piden "máis proteción" para o cabalo "sendo o mamífero máis grande de Europa en liberdade"
A Rapa das Bestas de Sabucedoretoma as súas habituais datas entre o 30 de xuño e 4 de xullo.
Por Europa Press / Redacción | SANTIAGO DE COMPOSTELA | 15/06/2022 | Actualizada ás 14:06
A nova edición da Rapa das Bestas de Sabucedo, na Estrada, un evento declarado Festa de Interese Turístico Internacional, celebrarase entre o 30 de xuño e o 4 de xullo. O festexo volve ás súas datas de celebración habituais tras trasladarse a finais de agosto en 2021 debido á pandemia.
Nava Castro destacou durante a súa intervención que esta festa é "unha das primeiras de Galicia" en ser declarada de Interese Turístico Internacional, no ano 2007. "Esta celebración axuda a situarnos e a demostrar que en Galicia sabemos manter as tradicións e presumir delas cun coidado exquisito", indicou.
O presidente Asociación Rapa das Bestas, pola súa banda, insistiu en que a "esencia" deste evento é o "cabalo galego de monte". "Temos moita densidade de monte que esta animal axuda a manter limpo e a darlle unha biodiversidade maior a Galicia", detallou, facendo ademais un chamamento ás administracións. "Sendo o mamífero máis grande de Europa en liberdade, deberían facer por protexelo", sentenciou.
En canto ás cifras de asistentes, Paulo Vicente sinalou que "só nos 'curros' entran en tres días 4.500 persoas", polo que calculan que ao longo do fin de semana participarán na festa "entre 10.000 e 12.000 persoas".
Respecto dos animais, os datos rexistran a existencia de ao redor de 400 cabalos en 45 kilometros cadrados, segundo Vicente, e en rapa "moven ao redor de 250 ou 300".
PROGRAMACIÓN CULTURAL
Ademais dos traballos de baixa, rapa, marcaxe, identificación e desparasitación dos animais, o programa deste ano inclúe visitas turísticas pola parroquia e exposicións permanentes. No campo musical, o festival 'RapaSons' presenta unha quincena de concertos, entre os que destacan Treixadura, O caimán do río Tea, Combo Calada, Zënzar e unha verbena a cargo da orquestra París de Noia.
O evento espertou interese a nivel internacional e conta cunha trintena de profesionais da comunicación acreditados de sete países: Corea do Sur, China, Estados Unidos, Reino Unido, Alemaña, Portugal e España.
