Máis de medio cento de incendios forestais foron provocados por raios en Galicia segundo Medio Rural
En declaracións aos medios na Pobra, o conselleiro explicou que se dirixe a Galicia un pelotón duns 30 efectivos da Unidade Militar de Emerxencias (UME) e tres motobombas.
Por Europa Press / Redacción | SANTIAGO DE COMPOSTELA | 15/07/2022 | Actualizada ás 19:17
O femónemo meteorolóxico rexistrado en Galicia, chamado sistema convectivo de mesoescala, "unha gran treboada que afecta a unha gran área xeográfica", deixou un total de 52 incendios provocados por raios entre as 20,00 horas do xoves e as 8,00 horas do venres. Nese marco temporal, houbo catro horas na que se produciron a maioría dos incendios, 41 lumes, entre as 20,00 horas do xoves e a medianoite.
Diso informou o conselleiro de Medio Rural, José González, durante unha visita ao municipio lucense da Pobra do Brollón, onde o lume na parroquia de Saa obrigou a activar unha Situación 2 por proximidade a núcleos habitados, incluída a evacuación de 40 mozos dun campamento no Busto.
En Galicia, foron ata o momento tres as Situacións 2 activadas nas últimas horas, dúas no municipio de Folgoso do Courel e a outra a da Pobra. Precisamente, nestes dous municipios e no de Quiroga a situación complicouse ao producirse "treboadas secas", é dicir, houbo raios pero non caeu auga que axudase a extinguir eses lumes.
A isto únese a problemática dos coñecidos como "raios latentes", aqueles que provocaron un incendio "por baixo da terra e despois aparecen", xa que poden tardar en manifestarse no exterior, polo que é posible que aparezan máis lumes "ao longo de hoxe ou mañá".
A onda de calor, con temperaturas extremas, e as treboadas rexistradas na pasada noite, han recrudecido os incendios forestais rexistrados na comunidade galega, onde os máis grandes, en ao redor dunha decena de municipios, deixan xa máis de 1.500 hectáreas arrasadas.
MEDIOS DA UME
En declaracións aos medios na Pobra, o conselleiro explicou que se dirixe a Galicia un pelotón duns 30 efectivos da Unidade Militar de Emerxencias (UME) e tres motobombas. Mentres, están despregados pola comunidade a trintena de medios aéreos operativos. Así mesmo, explicou que se demandou un novo hidroavión FOCA ao Goberno central, o cal foi concedido. González destaca que "todas as administracións están a traballar arreo para protexer á xente das aldeas". Apela á prudencia e colaboración cidadá "nestes días tan complicados".
Cuestionado sobre se o baixo nivel dos encoros provoca dificultades nas tarefas de extinción, José González admitiu que esa problemática "pode ser sempre unha complicación para o traballo de medios de extinción", aínda que asegura que están "a cargar rápido dentro da dificultade". Ademais, as "altas temperaturas non están a axudar nada na extinción", polo que queda moito traballo para perimetrar os incendios.
A preguntas acerca das queixas sobre atraso na chegada de medios aéreos a Folgoso do Courel, o conselleiro de Medio Rural indicou que había orde de "non entrar antes das 10,30 por regras de seguridade" aérea, dado que as aeronaves teñen "necesidade de claridade do día para empezar a actuar". Afirma que "se traballou con dilixencia" e non houbo "ningún problema técnico".
