A Xunta licita a elaboración dun plan para zonificar a implantación de vertedoiros de residuos non perigosos
Por Europa Press / Redacción | SANTIAGO DE COMPOSTELA | 09/04/2025 | Actualizada ás 16:54
A Xunta, mediante a Consellería de Medio Ambiente e Cambio Climático, licitou o contrato de elaboración do plan específico para a zonificación da implantación de vertedoiros de residuos non perigosos en Galicia. Cun orzamento de 42.686,26 euros, IVE incluído, o obxecto deste plan é identificar que zonas son aptas ou non aptas para albergar a futuro este tipo de instalacións.
Segundo informou a Xunta nun comunicado, a elaboración desta planificación farase, por unha banda, aplicando unha metodoloxía baseada en sistemas de información xeográfica e por outro, nunha análise multifactorial. Desta forma, os principais criterios e condicionantes que terán en conta para zonificar o territorio serán a proximidade a áreas residenciais e industriais, a existencia de augas subterráneas e reservas naturais próximas ou a protección do patrimonio cultural, entre outros factores.
Este enfoque permitirá recompilar, xestionar e analizar datos espaciais, identificando as áreas idóneas para albergar este tipo de depósitos e asegurando decisións fundamentadas en evidencias, minimizando riscos ambientais e climáticos, impactos paisaxísticos e de saúde pública.
Co mesmo obxectivo tamén valorarán unha distribución xeográfica proporcional e racional dos vertedoiros do territorio, para evitar, por exemplo, unha posible concentración destas instalacións nunha mesma provincia.
O prazo de execución do contrato é de 13 meses e dividirase en tres fases. A primeira centrarase en definir a metodoloxía de traballo e o inventario de condicionantes para a súa implantación a futuro e en facer unha diagnose da situación actual dos vertedoiros de residuos non perigosos autorizados en Galicia. A continuación, elaborarán o borrador e recompilarán a información necesaria para iniciar a tramitación ambiental do documento inicial e nunha terceira fase, redactarán a versión definitiva, que estará lista o ano que vén.
