Zahara, Coque Malla, Fernando Costa, Camela e Los Planetas nunhas Festas da Peregrina "como as de antes"

O Concello de Pontevedra presentou este martes o programa das Festas da Peregrina 2022 que, segundo adiantou a concelleira, Carme dá Silva, serán "como as de antes". "Vai ser imposible non escoitar música nas rúas de Pontevedra durante estes días", sinalou. Así, os grandes concertos volven sen ningún tipo de restricións á Praza de España coas actuacións de Zahara, Coque Malla, Fernando Costa, Treixadura, Juancho Marqués, o musical 'O pequeno Rei da Sabana', Camela, Ilegales, Víctor Manuel e Los Planetas.

Os primeiros actuarán o día 20 de agosto e Los Planetas o sábado 13. No caso de Víctor Manuel, a súa actuación vén substituír o concerto de Bunbury, programado baixo a bandeira do Xacobeo 2022, que foi cancelado pola imposibilidade de continuar a súa xira de despedida. O que ía ser un concerto de pago na chaira do Recinto Feiral o día 12, será agora unha continuidade das Festas o día 22 de agosto, gratuitamente, na Praza de España.

Todos os días haberá charangas, pasacalles e bandas de gaiteiros, para encher de música cada recuncho da cidade e propiciar un ambiente festivo. Tamén se recupera a Batalla de Flores, que verá aumentado o seu percorrido este ano, partindo de Virxinia Pereira, pasando por Loureiro Crespo, Benito Corbal, Cobián Roffignac e Pai Amoedo.

O público infantil terá o seu espazo na Praza da Curtidoira con diversos talleres e espectáculos infantís como: 'Puño Puñete', de Baobab Teatro, o martes 16; 'As minas do Rei Salomón', o mércores 17, con Teatro Ghazafelhos; 'Soño', o venres 19, con Troula Animación; ou 'Ghop!', o sábado 20, con Teatro ao Cubo.

Continuando coa tradición das festas, o pregón será lido o sábado 13, ás 12,00 horas; mentres os espectáculos pirotécnicos terán lugar ese mesmo sábado, na media noite; o luns 15, no mesmo horario; e o domingo 21; sempre entre a Ponte do Burgo e a Ponte de Santiago.