A capacidade do Camiño Francés reduciuse un 18% polas medidas Covid, segundo un estudo

Un estudo da Universidade de Santiago de Compostela (USC) apunta a que a capacidade do Camiño Francés puido verse reducida un 18% polas medidas de distanciamento contra a Covid-19, pero quedou aínda lonxe "do punto de saturación".

Isto indica o traballo 'O impacto da crise sanitaria da Covid-19 sobre a capacidade de carga turística do Camiño Francés', presentado este martes nun relatorio polo seu responsable, o profesor de Economía da USC Roberto Bande, no marco de 'As Leccións Xacobeas', unha xornada organizada pola cátedra do Camiño de Santiago e das Peregrinacións da Universidade de Santiago de Compostela.

Segundo explican nun comunicado, a capacidade de carga turística é un concepto técnico co que se explica cantos peregrinos pode admitir o Camiño "de maneira cómoda". O estudo conclúe que, como consecuencia das medidas de distanciamento, a capacidade do Camiño puido reducirse un 18% para acoller peregrinos. "En realidade, a redución da capacidade derivada das medidas de prevención estivo moi lonxe do punto de saturación do Camiño Francés", advirte. 

Ademais deste relatorio, as Leccións Xacobeas Internacionais continuaron tamén coa presentación de diversos traballos sobre as peregrinacións na Idade Media e a súa presenza na novela histórica actual --con oito investigadores-- e no teatro portugués. O corpus abarca a análise de oito narracións publicadas nos últimos corenta anos asinadas por Isabel San Sebastián, Genaro Vallejos, Toti Martínez de Lezea, Luís García Gambrina, Jesús Fernández Martínez, Jesús Torbado, Matilde Asensi e Basilio Losada.

Na sesión de tarde proxectouse o documental Egeria, a primeira peregrina, dirixido polo xornalista compostelán Luís Menéndez, á que seguiu un coloquio.