Estes son os actos políticos centrais para o Día da Patria

A manifestación nacionalista que convoca tradicionalmente o BNG ás 12 horas na Alameda compostelá e a ofrenda floral Protagonizada polo PSdeG en Rianxo concentran os actos políticos do Día Nacional de Galicia este 25 de xullo, cuxo acto institucional se mantivo para este domingo, día 24, coa entrega das Medallas de Ouro.

Pola súa banda, os populares galegos celebraron o pasado venres o acto político do partido, en Mondoñedo, cun discurso no que o PPdeG enarborou a bandeira do "galeguismo integrador" con palabras de Castelao na terra de Álvaro Cunqueiro.

No manifesto, lido pola presidenta provincial do PP de Lugo, Elena Candia, baixo a presidencia do líder do PPdeG e titular da Xunta, Alfonso Rueda, e a secretaria xeral, Paula Prado, os populares definíronse como "un partido centrado, ordenado, reformista e galeguista" que, á súa vez, "tivo e ten a responsabilidade de gobernar a construción da Galicia moderna que hoxe coñecemos".

MANIFESTACIÓN DO BNG, ACTO CENTRAL

Despois de que en 2021 a mensaxe fose o dunha "Galicia sen límites" --tras lograr situarse no Parlamento galego como segunda forza política en 2020--, o BNG celebra este Día da Patria coa mirada posta nos procesos electorais que están por vir --municipais e europeas, as xerais e, en 2024, as autonómicas-- cunha mensaxe: "Gañar o futuro" e "a nova Galiza en marcha".

Ademais, o BNG, tras lanzar a idea de "ensanchar" as bases sociais, quere lanzar agora as propostas "sociais" para a recuperación social, centradas en medidas de recuperación ante a crise de prezos aburada pola guerra en Ucraína. A manifestación, que despois de dous anos recupera a 'normalidade' tras os momentos máis duros da pandemia, arrincará ás 12,00 horas da Alameda e desembocará na Praza da Quintana, onde a líder nacionalista, acompañada da Executiva Nacional, pronunciará o discurso final.

Previamente, está previsto que o faga a secretaria xeral de Galiza Nova, Marta Gómez, tras unha manifestación na que non faltarán as delegacións convidadas, entre os que estarán Joana Mortagua (Bloco de Esquerdas), e as deputadas no Congreso Marta Rosique (ERC) e Mertxe Aizpurua (EH Bildu), aínda que tamén haberá representación do resto de organizacións nacionalistas e soberanistas do resto do Estado e internacionais.

O BNG recupera tamén a tradicional comida de confraternización na Carballeira de Santa Susana e volve o Festigal, o festival que organizan as mocidades nacionalistas --Galiza Nova-- no campus universitario e que, entre outras actuacións, ten a Tanxugueiras como prato forte.

ESTATUTO NOVO PARA GALICIA

Pola súa banda, o secretario xeral do PSdeG, Valentín González Formoso, estrearase como líder do partido na tradicional ofrenda floral que terá lugar ás 11,30 horas en Rianxo ante a estatua de Catelao, tras o que fará unha intervención pública.

Segundo avanzaron a Europa Press fontes socialistas, Formoso reafirmarase no seu discurso na necesidade de "lograr un novo Estatuto" para Galicia, o cal "permita alcanzar o máximo teito competencial e incorporar unha carta de dereitos" ou "todos os instrumentos xurídicos e normativos posibles" para "responder con axilidade a situacións de emerxencia como a pandemia", como pode ser a figura do decreto lei que Galicia non ten.

"Fronte ao inmobilismo duns e os que ven no Estatuto un 'traxe vello' do que desprenderse para buscar outra relación co Estado", en referencia velada a populares e nacionalistas, o PSdeG aposta por "unha revisión profunda do autogoberno e a actualización do texto", un documento de 1980 cando aínda "non había nin divorcio, nin estabamos na UE nin existía internet", pon como exemplo estas mesmas fontes para ilustrar esa necesidade de actualizar o marco galego.

ASEMBLEAS ABERTAS INDEPENDENTISTAS

Por segundo ano consecutivo, as 'Assembleias Abertas Independentistas' convocan tamén unha manifestación ás 12:30 horas na Alameda de Compostela. "Gostamos de soster este lugar comum que é o nosso dia da Pátria, o nosso dia da Mátria, que é de tanta importáncia para o nosso ser e sentir coletivos", explican nun comuincaddo. Baixo o lema "Construindo comunidade por umha Galiza Livre" desenvolverán unha xornada de "festa, encontro e irmandade" coa seguinte programación: "12:30 - Manifestaçom com saida desde a Alameda. 13:30 - Sessom vermú com Menina Arroutada na Praça 8 de Março. 14:30 - Jantar popular no CSO Escárnio e Maldizer. 17:00 - Sobremesa com karaoke galego".

OUTROS ACTOS

A capital galega tamén contará con actos políticos organizados por organizacións independentistas, na Praza de Cervantes --antiga Praza do Pan--. Pola súa banda, Anova, a organización fundada por Xosé Manuel Beiras en 2012, e que se atopa en plena renovación da dirección tras a dimisión do seu portavoz nacional Antón Sánchez, celebrará unha comida de confraternización nun asador compostelán na que está previsto que participe o propio veterano político.