Comezan os traballos de avaliación de danos do incendio do Courel para a recuperación da contorna

Técnicos do Centro de Investigación Forestal de Lourizán, en Pontevedra, desprazáronse ata a Serra do Courel para avaliar os danos provocados polo gran incendio forestal, que este xoves foi dado por extinguido despois de queimar 11.100 hectáreas.

Tal e como indica a Xunta, o obxectivo destas inspeccións é "poder tomar as medidas necesarias a curto e medio prazo que consigan recuperar o potencial forestal da contorna".

En canto aos lumes aínda vixentes en Galicia, o parte da Consellería do Medio Rural actualizado ata as 13,30 horas deste venres non recollía cambios con respecto ao desta mañá. Así, o incendio forestal de Vilariño de Conso (Ourense), que afecta 6.500 hectáreas do Parque Natural do Invernadeiro, continúa controlado. Do mesmo xeito, o de Castrelo de Miño, xurdido na parroquia de Barral pero estendido ata o municipio veciño de Cartelle, está estabilizado con 200 hectáreas arrasadas.

A vaga de incendios rexistrada en Galicia desde hai dúas semanas deixa un balance histórico de máis de 33.000 hectáreas queimadas, contando os que nos últimos días se foron apagando.

En concreto, os incendios extinguidos suman unhas 26.200 hectáreas, pero cabe lembrar que a Xunta só inclúe nos seus boletíns informativos aqueles que superan as 20 hectáreas de superficie.

Ademais dos macrofogos do Courel --11.100 hectáreas-- e Valdeorras --10.500 hectáreas--, a lista de incendios extinguidos é a seguinte: Cualedro --31 hectáreas--; Baiona --46 hectáreas--; Melón --dous lumes que suman 98 hectáreas--; Quiroga --345 hectáreas--; Ribadavia --67 hectáreas--; Covelo --37 hectáreas--; Cervantes, parroquias de Donís --75 hectáreas--, Noceda --182 hectáreas--, Cereixedo --65 hectáreas-- e O Castro --0,5 hectáreas--; así como Rodeiro --110 hectáreas--; Palas de Rei --375 hectáreas--; Antas de Ulla --54,1 hectáreas--; e O Saviñao --19,41 hectáreas--. Esta lista complétase co tres no concello de Oímbra, parroquias de Rabal --2.100 hectáreas--, San Cibrao --370 hectáreas-- e Videferre --919 hectáreas--.