Un equipo arqueolóxico investiga en Manzaneda a construción dun campamento romano
O obxectivo é obter datos que permitan coñecer como foi construído e avaliar o impacto das agresións practicadas por furtivos con detectores de metais observados no xacemento.
Por E.P. | SANTIAGO DE COMPOSTELA | 06/09/2022 | Actualizada ás 19:42
Un equipo arqueolóxico está a investigar no campamento romano de Penedo dos Lobos, en Manzaneda (Ourense), co obxectivo de obter datos que permitan coñecer como foi construído e avaliar o impacto das agresións practicadas por furtivos con detectores de metais observados no xacemento.
Segundo informan, a campaña está promovida pola Univerisdad de Salamanca, baixo a dirección científica do profesor José Manuel Costa, que comparte co investigador João Fonte (Universidade de Exeter). A dirección técnica dos traballos está a cargo de Francisco Alonso Toucido (Tempos Arqueológos).
A campaña prolongarase ata o 9 de setembro. A intervención está financiada por Turismo de Galicia e conta coa colaboración do Concello de Manzaneda e o Instituto de Ciencias do Patrimonio do CSIC (Incipit).
O campamento romano de Penedo dous Lobos está considerado como un recinto militar construído durante o avance dunha columna destas características e, por iso, ocupado durante pouco tempo. Estímase que foi construído para unha unidade militar de entre 800 e mil soldados.
