Intelixencia artificial e avances tecnolóxicos, claves para unha administración "moderna, rápida e eficaz"
O conselleiro de Facenda tamén garantiu o compromiso da Xunta cun sistema de auditoría e control que permita detectar con rapidez os posibles erros e incumprimentos
Por E.P. | SANTIAGO DE COMPOSTELA | 05/10/2022 | Actualizada ás 16:27
O coselleiro de Facenda e Administración Pública, Miguel Corgos, apelou este mércores ás técnicas de intelixencia artificial e aos avances tecnolóxicos como claves para unha administración "moderna, rápida e eficaz".
Díxoo durante a inauguración do curso superior Auditoría no sector público, organizado pola Escola Galega de Administración Pública (EGAP), onde tamén garantiu o compromiso da Xunta cun sistema de auditoría e control que permita detectar con rapidez os posibles erros e incumprimentos, simplificando a tramitación administrativa, reducindo os tempos e mellorando a calidade do control.
Así, Corgos avogou por aproveitar a utilización de técnicas como a 'web scraping', para detectar posibles fraudes entre empresas; algoritmos de procesamento de linguaxe natural, que permiten ler documentos como facturas, certificados, solicitudes ou declaracións, ademais de avaliar o seu contido; así como algoritmos de clasificación, para preseleccionar cando é probable que se produza un erro.
O conselleiro lembrou que o Goberno galego creou, dentro da Intervención Xeral da Comunidade Autónoma, a Oficina Galega de Intervención e Control (OGAC), que aspira a que os controis estean estandarizados e permitan ofrecer valor engadido aos xestores --proporcionándolles información case inmediata de posibles erros--, ademais de propor melloras que garantan a correcta xestión dos fondos públicos en termos de eficacia, eficiencia e boa xestión.
O responsable de Facenda aproveitou a súa intervención para resaltar o "papel fundamental" que xoga na xestión dos fondos europeos Next Generation a adopción de medidas de control da fraude. Unhas medidas que, segundo dixo, permiten garantir non só o cumprimento dos principios de boa xestión financeira e de legalidade, senón que as actuacións respecten principios relacionados cunha Europa orientada á transición verde e dixital.
