A Xunta ve "ilóxico" que os Estados teñan que dar axudas cando o veto á pesca de fondo parte de Bruxelas

A conselleira do Mar, Rosa Quintana, ve "un pouco ilóxico" que a Comisión Europea diga agora que os Estados deben habilitar axudas ao sector pesqueiro ante as perdas polo veto á pesca de fondo en 87 caladoiros do Atlántico, tendo en conta que é unha medida aprobada en Bruxelas e contra a que o Goberno central xa anunciou un recurso ante a xustiza comunitaria.

Ademais, advertiu que "non se trata tanto" de achegar subvencións, senón que o que quere o sector é "pescar". "Sobre todo, cando se pode acreditar con datos científicos que o estado dos recursos onde están a traballar os diferentes buques atópanse nunha boa situación biolóxica", explicou.

A conselleira do Mar volveu cargar contra o comisario de Pesca, Virginijus Sinkevicius, por ser "incapaz de recoñecer" que se equivocaron nesta restrición ás artes de fondo.

Neste sentido, Rosa Quintana esgrimiu que tampouco "ten ningún sentido" executar este regulamento --que entrou en vigor o pasado día 9 de outubro-- a dous meses vista de que se publique un novo informe científico do Consello Internacional para a Exploración do Mar (ICES, polas súas siglas en inglés). "Ben podía esperar", engadiu.

A titular de Mar da Xunta reivindicou que a pesca é unha actividade económica "que se dedica a producir alimento" e lamentou que "máis do 60 por cento" do peixe consumido en Europa "xa é un produto de importación".

Así, defendeu que o sector europeo é "responsable" e está "a manter en bo estado biolóxico todos os recursos sobre os que traballa". Por iso, instou a "todas as administracións" a apoialo e a Bruxelas a traballar "con rigor" e "baseándose nos mellores datos científicos".

Non en balde, lembrou que a Xunta levaba "seis anos" advertindo á Comisión de que había "un erro no modelo matemático" que empregaba para definir a situación da pescada no Cantábrico e establecer as cotas que, precisamente, a semana pasada se viron ampliadas.

"Agora acaban de recoñecer que tiñan un erro no modelo matemático e, a dous meses vista de que acabe o ano, increméntannos as posibilidades de pesca no Cantábrico un 84 por cento. Un disparate", sentenciou a conselleira.