Podemos e Ourense Mellor traballan nunha candidatura conxunta para as locais de 2023

A organización municipalista Ourense Mellor e a dirección local de Podemos Ourense acordaron traballar na configuración dunha candidatura conxunta para as eleccións locais da primavera de 2023. Así o anunciaron despois do encontro celebrado a fin de semana entre representantes do partido morado na Cidade das Burgas e o proxecto municipalista creado para a última convocatoria electoral, en 2019.

Ambas as organizacións políticas anuncian que se unen para "traballar no impulso" dunha candidatura que está aberta a outras "formacións progresistas" e tamén "a todas aquelas persoas interesadas en formar parte dun proxecto común de cidade".

Entre os obxectivos que se expoñen, apelan a construír un Ourense "amigable" coas persoas maiores, cos máis pequenos e cos mozos, así como elaborar políticas sociais, feministas, ecoloxistas e culturais porque queren "un Ourense que goberne de modo activo, creando plataformas para votar durante os catro anos e non soamente no mes de maio".

Ourense foi unha das cidades nas que en 2019 quedou patente a fragmentación do proxecto político coñecido como a 'unidade popular' das forzas 'rupturistas'.

Nas últimas municipais, na capital provincial houbo tres papeletas distintas de proxectos apoiados polas distintas forzas que no seu día lograron ser segunda forza parlamentaria en Galicia baixo o nome de En Marea: Ourense en Común, Podemos e Ourense Mellor.

Ningunha delas obtivo representación na Cámara municipal, algo que si alcanzara en 2015 a candidatura de Ourense en Común, da que se separou Podemos para ir ás urnas en 2019 en solitario.

Para esa cita xurdiu o proxecto municipalista Ourense Mellor, que contaba co apoio do aparello do partido En Marea e que acudiu ás eleccións encabezado polo histórico sindicalista Etelvino Blanco, falecido dúas semanas despois das eleccións.

Case catro anos despois, Podemos e Ourense Mellor recoñecen que a súa división "causou desilusión" na cidadanía e "permitiu que se mantivese no concello políticas caciquiis".

Por iso, fan un chamamento ás forzas políticas progresistas, ás asociacións veciñais e aos axentes culturais, así como "ás diversas plataformas de afectados e demais colectivos cidadáns" a que participen nun proxecto co que prometen "cambiar radicalmente a política ourensá.