Endesa reactiva a súa central térmica das Pontes cun dos dous grupos dispoñibles
A central apunta que "ante unha situación de crise enerxética como a actual", "pon en explotación dúas das súas unidades de produción", pero "mantén o seu compromiso de descarbonización para o ano 2040".
Por Europa Press / Redacción | SANTIAGO DE COMPOSTELA | 02/11/2022 | Actualizada ás 10:09
Endesa reactivou á primeira hora da mañá deste mércores a súa central térmica das Pontes, coa posta en marcha dun dos seus dous grupos dispoñibles, tras autorizar a mediados de setembro o Ministerio de Transición Ecolóxica o peche dos outros dous.
Segundo asegurou o director desta central, Ignacio Sáinz, "o grupo un xa entrou en explotación e o grupo dous está en proceso de revisión para poder reactivalo a primeiros de 2023", o que motivou que "a empresa aumentou o persoal medio da planta ata levala a unhas 60 persoas e prorrogáronse os contratos das auxiliares ata xuño de 2023".
En canto ao carbón, Sáinz detallou que o primeiro buque con carbón almacenado no porto exterior de Ferrol está a ser trasladado por estrada cara As Pontes e que "virán novas remesas en función do consumo dos grupos", ao estar prevista a chegada doutro barco con outras 160.000 toneladas, con carbón de Indonesia, que estima a súa atracada para este mércores.
Desde Endesa apúntase que "ante unha situación de crise enerxética como a actual" a empresa eléctrica "pon en explotación dúas das súas unidades de produción", a pesar de que "a nosa estratexia non variou, xa que Endesa mantén o seu compromiso de descarbonización para o ano 2040 e segue apostando polas enerxías renovables".
Por último, Ignacio Sáinz detallou que "Endesa agradece a profesionalidade do seu persoal propio nestes momentos de incerteza, sobre todos aqueles que tiveron que retornar, o mesmo que os empregados das empresas contratistas".
