Convenio entre o Sergas e igrexas evanxélicas para habilitar espazos hospitalarios onde dar asistencia relixiosa
Desde a Consellería de Sanidade sinalan que o convenio asinado este martes en Santiago non implica ningunha dotación económica.
Por E.P. | SANTIAGO DE COMPOSTELA | 08/11/2022 | Actualizada ás 14:49
O conselleiro de Sanidade, Julio García Comesaña, e o secretario executivo do Consello Evanxélico de Galicia (CEG), Germán Collazo Fernández, asinaron este martes un convenio de colaboración polo que o Servizo Galego de Saúde (Sergas) cederá espazos dos hospitais para prestar asistencia relixiosa a pacientes que profesen o cristianismo evanxélico.
A través dun comunicado, a Xunta explica que este acordo permite continuar "garantindo o exercicio da liberdade relixiosa na rede sanitaria pública galega". Así, os usuarios que profesen o culto evanxélico poderán empregar estancias dos hospitais para iso.
En calquera caso, tal e como explican a Europa Press fontes da Consellería de Sanidade, o convenio asinado este martes en Santiago non implica ningunha dotación económica. Neste contexto, a Xunta está traballando nun novo decreto de sanidade mortuoria, para a realización de ritos funerarios segundo outras confesións, como a musulmá e a xudía.
CONVENIO PARA A DOAZÓN DE SANGUE
Nesta mesma xornada, o conselleiro de Sanidade asinou outro convenio co presidente da Federación Galega de Irmandades de Donadores de Sangue, Manuel Fonseca Gómez, para o desenvolvemento, por parte da Federación, do fomento da hemodonación altruísta en Galicia.
Mediante a firma deste acordo formalízase o marco xeral de colaboración conxunta entre as dúas entidades, que ten como obxectivo "fortalecer unha conciencia social proclive á doazón de sangue", informa o departamento autonomico. O Sergas achegará 58.200 euros para o cumprimento deste convenio, que estará vixente ata o 31 de decembro deste ano.
No mesmo acto, a directora da Axencia de Doazón de Órganos e Sangue (ADOS), Marisa López García, avanzou que durante os meses de novembro e decembro, a entidade intensificará a súa actividade, co ánimo de conseguir as reservas suficientes de face as festas do Nadal, onde adoita precisarse unha maior cantidade de sangue.
De acordo co convenio subscrito este martes, a Federación cumprirá as directrices e instrucións de coordinación e programación establecidas polo Sergas; fomentará a doazón de sangue por toda a xeografía galega a través de distintos medios como charlas, carteis ou trípticos. Así mesmo, informará os cidadáns da importancia de colaborar de maneira solidaria na cobertura das necesidades de sangue e hemoderivados dos hospitais galegos.
