O Goberno central rexeita "falar de prazos" para a chegada dos trens Avril a Galicia
José Miñones considera debe "primar a seguridade" na fase de homologación destes vehículos.
Por E.P. | Santiago de Compostela | 12/01/2023 | Actualizada ás 12:14
O delegado do Goberno, José Miñones, rexeita "falar de prazos" para a chegada dos trens Avril, de alta velocidade, a Galicia, xa que considera debe "primar a seguridade" na fase de homologación destes vehículos. "Agora non é momento de correr", afirma.
Miñones sostén que hai que "ser moi precavidos e cautelosos". "Temos que ter todos claro que o que ten que primar é a seguridade", sentenza.
"Agora non é momento de correr, o momento de correr foi antes; por iso eu lamento que durante anos houbese un silencio por parte da Xunta", expón. "Os que agora critican que non chegan os trens Avril, en 2016, 2017, 2018 onde estaban? Porque aí era cando se podía acelerar o proceso, aí era cando se podían sacar os contratos, pero eses quedaron nun caixón", agrega.
Así, subliña que "tivo que chegar este Goberno e pór en marcha o que era o contrato", pero "cando se chega ao momento da homologación é cando non se pode correr", é "onde hai que facer as cousas ben, con coidado".
"Eu que veño dun concello, dunha alcaldía, sei que falar de prazos nunca é bo. Faranse cando se teñan que facer e poranse en marcha cando se teña seguridade de que funcionan". "É o que se merecen os galegos", asegura Miñones. Ademais, resalta que o AVE xa chega a Galicia e que hai tempos recortados nas viaxes.
