Novas mobilizacións este mércores para esixir un convenio "digno" nas empresas estibadoras da Coruña
O obxectivo é a firma dun convenio que mellore as condicións laborais e salariais dos empregados do sector.
Por E.P. | SANTIAGO DE COMPOSTELA | 16/01/2023 | Actualizada ás 18:58
Traballadores de empresas estibadoras da provincia da Coruña retomarán as mobilizacións o vindeiro mércores, día 18 de xaneiro, para esixir un convenio "digno" debido a que o documento actual non se renovou desde 2019.
Nun comunicado, a Federación Galega de Alimentación, Mar, Transporte, Téxtil e Telecomunicacións e actividades afíns da CIG (Fgamt-CIG) indicou que as protestas se repetirán todos os mércores a partir das 17,30 horas diante da Autoridade Portuaria de Ferrol.
O obxectivo é a firma dun convenio que mellore as condicións laborais e salariais dos empregados do sector. Foi en 2021 cando romperon as negociacións, retomándose o ano pasado pola iniciativa da CIG, segundo reivindica o sindicato.
"Na actualidade, tras tres reunións, a posición da patronal segue sendo a de non aceptar a existencia dunha cláusula de revisión salarial que garanta o mantemento do poder adquisitivo, algo tan necesario en tempos nos que o IPC se disparou", criticou a CIG.
Ademais, sinalou que a parte empresarial oponse de forma "rotunda" a negociar a regulación do persoal fixo descontinuo, ademais de que non aceptan avances en materias como licenzas ou xubilación.
Para a organización sindical, é "fundamental" que o convenio garanta o mantemento do poder adquisitivo e avance nas condicións sociais do sector "que levan sen mellorar desde hai máis de 15 anos". Por todo iso, chamou ao persoal a mobilizarse para acabar con "moitos anos" de falta de melloras no sector.
