Rueda evita opinar sobre o aborto: "O TC falou e os dereitos desa lei débense respectar"

O presidente da Xunta e líder do PP galego, Alfonso Rueda, evitou manifestar a súa "opinión" persoal sobre o aborto pero, en clave política, aliñouse coa tese de que, unha vez que o Tribunal Constitucional (TC) avalou a norma fronte ao recurso presentado anos atrás polos populares, "os dereitos reflectidos nesa lei débense respectar".

Así o manifestou, a preguntas dos medios, no marco do debate aberto nas filas populares e despois de que o seu xefe de filas, Alberto Núñez Feijóo, manifestase que o aborto é "un dereito legal" da muller en España, aínda que non "un dereito fundamental".

Rueda sumouse politicamente á tese do "dereito legal" nunha comparecencia na que asegurou que, baixo o seu punto de vista, o debate sobre o aborto "quedou resolto co pronunciamento do Constitucional". "Dixo que a lei era válida e, por tanto, o que está na lei convértese en dereitos", alegou. "Hai unha lei, hai que cumprila e, por tanto, os dereitos reflectidos nesa lei son dereitos que se deben respectar", resolveu.

"ESCANDALIZADO"

Noutra orde de asuntos, o presidente galego declarouse "escandalizado" pola negociación entre os socios do Goberno central para a modificación da denominada lei do 'só si é si', por mor das rebaixas de penas a agresores sexuais á que deu pé.

Rueda lamentou que en Galicia se rexistraron máis do 10%, e esgrimiu que, mentres día a día prodúcense rebaixas e excarceracións, PSOE e Podemos estean encerellados no que cualificou de "discusión infantil e chea de soberbia".

"Sabemos que pasan os días e esa reforma non empeza", lamentou e, aínda que esgrimiu que "o dano xa está feito", insistiu en que é preciso actuar canto antes para evitar que siga empeorando a situación

O CONGRESO APROBA DEFINITIVAMENTE A REFORMA QUE ELIMINA O PERMISO PATERNO EN MENORES DE 16 A 17 ANOS

O Congreso dos Deputados aprobou este xoves definitivamente a lei orgánica pola que se modifica a Lei de saúde sexual e reprodutiva e da interrupción voluntaria do embarazo, que devolve o dereito ao aborto ás menores de 16 e 17 anos sen necesidade de contar con permiso paterno, elimina os 3 días de reflexión, garante que se poida levar a cabo en hospitais públicos e blinda o aborto fronte a protocolos antiabortistas como o que propuxo Vox en Castela e León.

A ministra de Igualdade asegurou que é un "día histórico" para as mulleres. "Recuperamos o dereito que furtaron ás mozas de 16 e 17 anos a decidir sobre o seu propio corpo, informando e compartindo ese proceso coas súas familias, con quen queiran pero sendo elas e só elas as que deciden", apuntou.

AS DECLARACIÓNS DE FEIJÓO SOBRE O ABORTO

Durante o debate, desde o PSOE, afeouse ao PP o "espectáculo" que deron esta semana coa súa posición sobre o aborto --en referencia ás declaracións do líder do PP, Alberto Núñez Feijóo, sobre a postura do Tribunal Constitucional-- e espetoulles que o feito de "que o aborto sexa un dereito non depende" do que diga o PP.

Pola súa banda, a deputada do PP Marta González criticou a "lunática vontade do Ministerio de Igualdade por deixar o seu sinal" con esta reforma "innecesaria, inoportuna e inesperada", e pediu a Irene Montero que reflexione sobre a "dimisión" tras o "tsunami penal" xerado con de a Lei do só si é si.