Piden 17 anos para o home que asestou "entre 80 e 90" coiteladas a outro nun hostal de Mondariz
O procesado foi diagnosticado hai anos de psicose esquizofrénica paranoide e estivo hospitalizado en varias ocasións.
Por Europa Press / Redacción | VIGO | 13/04/2023 | Actualizada ás 19:24
A Fiscalía pide 17 anos de prisión para un home acusado de asasinato e que, en xaneiro de 2021, presuntamente acoitelou ata a morte a outro home, que vivía no hostal de Mondariz onde o propio procesado se aloxaba neses momentos.
Segundo se recolle no escrito de acusación do Ministerio Público, os feitos ocorreron en xaneiro de 2021. Neses momentos, acusado e vítima eran os únicos hóspedes dun hostal en Mondariz, e mantiñan unha mala relación de veciñanza porque, ao parecer, o acusado puña música a gran volume de madrugada, daba golpes na parede e pedía con frecuencia tabaco á vítima.
A vítima, que levaba 17 anos vivindo nese establecemento, trasladou á propietaria do negocio as súas queixas pola actuación do acusado e este, ao decatarse, díxolle ao outro hóspede que o fodeu e que o ía a "pasar pola pedra".
O 9 de xaneiro de 2021, o acusado comprou un coitelo de cociña nun bazar de Ponteareas, cunhas características que, segundo o informe forense, son compatibles coas múltiples feridas que presentaba o corpo da vítima ("entre 80 e 90" lesións incisas por arma branca).
A Fiscalía sostén que, nalgún momento entre a tarde do 17 de xaneiro (cando a vítima foi visto con vida por última vez) e a noite do 22 de xaneiro (cando foi localizado o seu cadáver), o acusado acoitelouno ata matalo. O procesado foi diagnosticado hai anos de psicose esquizofrénica paranoide e estivo hospitalizado en varias ocasións. Así mesmo, consta que non ten unha boa adherencia ao tratamento que debe recibir de modo crónico.
DELITO E PENAS
Por estes feitos, acúsao dun delito de asasinato, e pide que se lle aplique a atenuante de alteración psíquica, xa que é posible que, no momento dos feitos, tivese unha diminución parcial da súa capacidade volitiva, aínda que non conste unha diminución nas súas facultades intelectivas.
Así, reclama que se lle impoña a pena de 17 anos de cárcere e que se lle prohiba achegarse ou comunicarse cos parentes da vítima por un período de 23 anos. Tamén pide que indemnice aos familiares do falecido.
