Repuntan as mortes por covid, sete nos últimos días
Polo momento, hai menos de 1.000 contaxiados.
Por Europa Press / Redacción | SANTIAGO DE COMPOSTELA | 04/05/2023 | Actualizada ás 21:00
A covid demostra que aínda segue sendo unha pandemia perigosa. A pesar da vacinación, segue causando moitas mortes. E é que nos últimos días, sete persoas faleceron por mor deste mal.
Galicia rexistra actualmente un total de 987 casos activos por coronavirus, con datos actualizados a data do mércores, ás 18,00 horas, pola Consellería de Sanidade. Mentres o número de falecidos elévase a 4.143 tras sete novas mortes rexistradas nos últimos días.
En concreto, foron unha muller de 87 anos, o pasado 18 de abril e un home de 74 anos, o pasado 28 de abril, ambos na área sanitaria de Vigo, ademais dun home de 89 anos, na área sanitaria da Coruña e Cee, o 2 de maio.
Tamén morreu un home de 64 anos, na área sanitaria de Vigo, o pasado 28 de abril; e dous homes, de 94 e 83 anos, na área sanitaria da Coruña e na de Ferrol, respectivamente, o pasado 29 de abril e unha muller de 80 anos, na área sanitaria da Coruña e Cee, o día 2. Todos tiñan patoloxías previas.
CASOS ACTIVOS
En canto aos casos activos, 182 corresponden á área sanitaria da Coruña, 139 á de Lugo e o mesmo número á de Ourense, 98 á de Pontevedra, 184 á área de Vigo, 167 á de Santiago e 77 á de Ferrol. Do total de pacientes positivos, seis están en UCI e 137 en unidades de hospitalización, ademais de 844 en seguimento nos seus domicilios.
Por áreas sanitarias, na da Coruña hai 30 en planta e dúas en UCI; na de Ferrol, 13 e un en cada caso e na de Lugo, 11 en planta e un en unidade de coidados intensivos. Nas de Ourense e Pontevedra hai, respectivamente, 19 e 16 en planta. Na primeira non hai ingresados en UCI e na segunda hai un. Mentres, na de Santiago son 20 en planta e un en UCI e na de Vigo son 28 en planta e ningún en coidados intensivos.
