Abre o prazo para solicitar axudas autonómicas para libros de texto e material escolar
O período para que as familias poidan realizar os trámites para beneficiarse vai ata o 21 de xuño.
Por Europa Press / Redacción | SANTIAGO DE COMPOSTELA | 20/05/2023 | Actualizada ás 12:37
A Xunta abriu este sábado o prazo para solicitar as axudas de para libros de texto e material escolar. O período para que as familias poidan realizar os trámites para beneficiarse vai ata o 21 de xuño.
Poderán presentar as súas solicitudes os pais, nais, titores ou representantes legais do alumnado, preferiblemente de forma electrónica a través do formulario dispoñible desde a sede electrónica https://sede.xunta.gal/portada. Opcionalmente, poderán presentar as solicitudes de forma presencial nos centros docentes ou en calquera dos lugares e rexistros previamente establecidos.
Ademais, segundo a Xunta, será requisito fundamental para acceder ao Fondo Solidario de Libros ou recibir as axudas para libros ou material escolar devolver os do curso anterior.
Estas liñas de actuación van destinadas ao alumnado matriculado en Primaria, ESO e Educación Especial en centros docentes sostidos con fondos públicos para o curso escolar 2023/24 e as convocatorias poden consultarse no Diario Oficial de Galicia e no Portal Educativo.
Segundo o Goberno autonómico, prevese que as diferentes liñas de axudas cheguen a máis do 70% do alumnado de centros sostidos con fondos públicos de Primaria, ESO e Educación Especial, de modo que se supere a porcentaxe con respecto ao actual ano académico a piques de terminar.
MATERIAL ESCOLAR
No caso do material escolar, o valor do bono deste ano vaise a manter en 75 euros para as familias con ingresos de ata 6.000 euros per cápita. Ademais, créase un novo bono de 60 euros para as familias que se sitúen no tramo entre 6.000 e 10.000 euros per cápita. Con esta medida, a Xunta prevé un aumento do 40% no número de alumnos beneficiados, pasando de 95.000 a 130.000.
No caso do alumnado de Educación Especial ou cunha discapacidade igual ou superior ao 65 por cento, así como o alumnado en situación de garda ou tutela da Xunta de Galicia, todos eles serán beneficiarios do vale de 75 euros independentemente dos ingresos.
LIBROS DE TEXTO
No caso dos libros de texto, o sistema organízase en base a dous tipos de axudas: as bolsas para a compra de manuais en etapas nas que estes non poden ser reutilizados dun curso a outro, 1º e 2º de Primaria, Educación Especial e alumnado con necesidades educativas especiais; e o Fondo Solidario de Libros, cando estes poden ter unha vida útil de varios anos e ser utilizados por varios alumnos ao longo de cursos sucesivos, desde 3º de Primaria ata 4º de ESO.
A Xunta informou que subiu o valor das axudas para a compra de libros, que oscilarán entre os 160 euros e os 270 euros, fronte aos 140 e os 240 do curso pasado. Para os escolares de 1º e 2º de Primaria, a axuda continuará dependendo da renda per cápita da unidade familiar.
No primeiro tramo, para os que teñen a renda igual ou inferior a 6.000 euros, o beneficio é de 240 euros, ante os 210 euros do último ano escolar; mentres que no segundo tramo é para os que teñen renda entre 6.000 e 10.000 euros, para o que a axuda será de 160 euros.
No caso do alumnado con necesidades específicas de apoio educativo, que non poida utilizar libros do fondo, na etapa de Primaria, as familias do primeiro tramo de renda percibirán 240 euros por fillo e as do segundo tramo, 160 euros. Na etapa de ESO, as familias do primeiro tramo de renda poderán acceder a unha axuda de 270 euros; e as do segundo, a 180 euros.
O alumnado de Educación Especial, tanto en centros específicos como en unidades de Educación Especial de centros ordinarios ou cunha discapacidade igual ou superior ao 65 por cento, recibirá 300 euros independentemente da renda per cápita familiar. O alumnado en situación de garda ou tutela da Xunta de Galicia, o importe da axuda será o maior correspondente ao ensino e curso no que estea matriculado, independentemente da renda per cápita da unidade familiar.
