Migrantes expulsados, sen rede de apoio e cunha difícil solución xudicial

Unha vintena de inmigrantes acollidos no recinto compostelán do Monte do Gozo xa viron rexeitada a súa solicitude de asilo, polo que poderían ter que abandonar o recinto. Esta situación á que se enfrontan agora estas dúas decenas de persoas, moitas delas sen unha rede de apoio en España, non é "puntual", segundo afirman ONGs e algúns municipios acolledores como o de Santiago.

E é que as denegacións provisionais de asilo publícanse cada 15 días no Boletín Oficial do Estado (BOE). As primeiras, que afectaban a Santiago, saíron o 1 de novembro e por iso o pasado 15 de novembro o Concello de Santiago atopouse con sete persoas sen recurso habitacional. Ese mesmo día, explicou a concelleira de Servizos Sociais de Santiago, María Rozas, esta semana, volveron saír denegacións no BOE, "denegacións de xente que é expulsada e que terá que deixar ou terían que deixar esas instalacións o próximo 30 de novembro".

As DENEGACIÓNS VAN A CONTINUAR, SEGUNDO O FORO DE INMIGRACIÓN

Consultado por Europa Press, o Foro Galego da Inmigración -- primeira entidade en denunciar a situación --, explicou que as resolucións negativas continuarán porque países como Senegal ou Mauritania non se consideran en guerra, polo que os afectados terían que demostrar que lles perseguen "concretamente a eles", algo que recoñecen "moi difícil".

Aínda que sinalan que saber o número concreto de prexudicados é complicado, posto que son as entidades colaboradoras as que dispoñen desa información que non comparten por protección de datos, Rozas vaticinaba que poderían verse afectadas un 40% das persoas acollidas. "Estamos a falar de máis de 300 persoas que veñen dun país en guerra como é Mali ou de países de extrema pobreza como Senegal ou Mauritania", lamentaba Rozas.

Segundo explican desde o Foro, aínda que teñen dereito a recorrer unha vez que chega a resolución negativa de asilo -- normalmente fano a través das entidades que levan os dispositivos --, deben abandonar de todos os xeitos o emprazamento nun prazo de 15 días. A solicitude ten dúas fases: unha primeira de manifestación de vontade e unha segunda que consiste nunha entrevista de petición. Tras isto, reciben unha folla con fotografía que lles serve de documentación e que indica unha data a partir da que poden traballar, ademais doutra data para renovar a solicitude.

Desde o Foro indican que durante todo este período están nunha situación regular en España e poden traballar -- e aínda coa petición denegada en primeiro termo, poden seguir traballando --. Finalmente, antes ou despois da renovación -- máis ou menos nun prazo de seis meses --, chegan as resolucións.

"BUSCAR UNHA ALTERNATIVA"

Nesta primeira negativa é o punto no que se atopan algúns dos refuxiados no Monte do Gozo. Algúns optaron voluntariamente por trasladarse a outros lugares, con amigos ou familiares, pero sete deles non dispuñan de rede de apoio. Este é o tema de fondo para o Foro e para o Concello de Santiago: ofrecer unha "alternativa razoable" a esas persoas, non só para ese sete, senón para os que virán partir do 30 de novembro -- para cando se prevé a publicación de máis denegacións de asilo --.

"Estamos a falar de persoas que quedan nunha situación totalmente abandonada, nunha situación desprotexida sen rede familiar, sen rede de apoio neste país e que se atopan ademais nunha situación onde aínda non adquiriron competencias lingüísticas nin unha inserción sociolaboral", criticaba María Rozas.

A responsable de Servizos Sociais da capital galega espera que todas as administracións públicas "estean á altura" e confía en que o compromiso da Delegación do Goberno de buscar unha solución sexa "firme". Na mesma liña exprésase o Foro da Inmigración, que insta á Delegación a ofrecerlle unha alternativa a esas persoas, "que non poden quedar na rúa sen recursos". "Facendo de verdade a xestión do tema, non dándolles unha lista de recursos aos que acudir", afirman.

A DELEGACIÓN REITERA QUE "SEMPRE SE FACILITA UNHA ALTERNATIVA"

Pola súa banda, fontes da Delegación do Goberno insisten en que sempre se facilita unha alternativa a todas as persoas migrantes e ratifican que continúan aloxadas no Monte do Gozo. A principios de semana, o delegado do Goberno, Pedro Branco, explicaba en declaracións aos medios nun acto na Coruña que esta situación responde ás primeiras resolucións de asilo, "algunhas concedéndoo e facilitando o resto de trámites e algunha que non se recoñece o asilo porque non cumpren algúns dos requisitos".

Refuxiados da guerra de Mali e migrantes á súa chegada ao Monte do Gozo | Fonte: César Argina