28M PSdeG: Zapatero e cinco ministros aterran na última semana da campaña
Lage pide o voto para un PSdeG que "dá solucións".
Por Europa Press / Redacción | SANTIAGO DE COMPOSTELA | 22/05/2023 | Actualizada ás 12:04
O PSdeG afronta a última semana da campaña electoral coa visita do expresidente do Goberno, José Luís Rodríguez Zapatero, e de cinco ministros para arroupar aos seus candidatos ás eleccións municipais do 28 de maio.
Os socialistas galegos arrincan esta semana decisiva coa visita do expresidente do Goberno José Luís Rodríguez Zapatero, quen participa ás 19,00 horas deste luns nun acto xunto á alcaldesa de Lugo e candidata á reelección, Lara Méndez.
Ata o vindeiro venres os socialistas galegos prevén contar co apoio do ministro de Inclusión, Seguridade Social e Migracións, José Luís Escrivá; da responsable de Educación e Formación Profesional, Pilar Alegría; do ministro de Sanidade, José Miñones; así como da responsable de Facenda, María Jesús Montero.Ademais, segundo explicaron fontes socialista, o venres, xornada de peche da campaña, está prevista a presenza da ministra de Defensa, Margarita Robles.
LAGE
O secretario de Organización do PSdeG, José Manuel Lage, pediu o voto o próximo 28 de maio para un Partido Socialista que "dá solucións" aos problemas da cidadanía e avisou de que cando a dereita goberna as cidades, "o que hai son leas".
"Leas permanentes, porque defenden outro tipo de intereses, non defenden os intereses xerais", manifestou o número dous dos socialistas galegos, que citou casos como os do Concello de Santiago durante a etapa do popular Conde Roa como alcalde ou a situación actual de Ourense, despois de que o PP apoiase a Gonzálo Pérez Jácome como alcalde.
José Manuel Lage pronunciouse deste xeito durante unha visita a Narón, na que arroupou ao candidato socialista á Alcaldía, Jorge Ulla, e onde asegurou que o PP é "sinónimo de inestabilidade e de non preocuparse polos problemas da xente".
