César Molina, exministro de Zapatero, cambia de chaqueta e apoia a Feijóo
Lembra que Feijóo xa foi presidente da Xunta e tivo que lidair cun "nacionalismo complicado" e apela a súa orixe galega para dicir que os galegos "non son de segunda".
Por Europa Press / Redacción | MADRID | 30/06/2023 | Actualizada ás 16:27
César Antonio Molina (A Coruña, 1952), que foi ministro de Cultura na etapa de José Luís Rodríguez Zapatero, reclamou este venres 30 de xuño o voto para o líder do PP, Alberto Núñez Feijóo, nas próximas eleccións xerais, atacando ademais ao actual presidente do Goberno, Pedro Sánchez.
"Confíen en Feijóo, hai que votarlle para que os fantasmas dun e outro lado non teñan opción", sinalou Molina durante a súa intervención nun acto en Madrid para presentar as liñas xerais dos populares no sector cultural.
"O presidente Sánchez pensa que só os vascos e cataláns son de primeira e o resto son de segunda ou de terceira. A pesar do que o presidente Sánchez di no Senado insultándonos a todos os galegos, Galicia é unha autonomía de primeira, pero é que todas o son. E Feijóo tamén é de primeira", engadiu.
Na súa defensa, Molina lembrou que Feijóo estivo "desde os primeiros anos da súa vida" traballando con "todos os galegos". "É o noso presidente, sentinme orgulloso representado por el e por iso estou aquí. Chegou o momento e estamos nunhas circunstancias complicadísimas do noso país", afirmou.
Molina cualificou a Feijóo como "un vello e gran amigo" co que viviu "moitas vicisitudes ao longo dos anos". "É unha persoa na que poden confiar, os galegos confiamos en Feijóo durante anos e anos e tivo maiorías nas que só os militantes e simpatizantes do PP non poderían haberllas dado", remarcou.
CONTRA O BNG
"En Galicia, Feijóo tívoo que loitar cun nacionalismo moi complicado e fíxoo moi ben co menor dano posible: ninguén como el tivo que tourear os mesmos problemas que terá que facer cando sexa presidente de España, porque os coñece e fíxoo ben", apuntou.
Molina insistiu na cultura como unha "cuestión de Estado" e pediu aos dous "grandes partidos" que cheguen a acordos nesta materia. "Espero que un salga da enfermidade que ten e volva estar no seu san xuízo e nese bipartidismo póidanse chegar a acordos de Estado", lamentou.
FEIJÓO AGRADECE APOIO DUN "SOCIALISTA CONVENCIDO"
Estas palabras tiveron resposta por parte de Feijóo no mesmo acto, quen agradeceu ao exministro o seu apoio. "César é alguén a quen admiro e respecto desde hai anos e é un socialista. Hoxe non pedimos carné para entrar nesta sala porque se non, os socialistas non poderían, e síntome orgulloso de que un socialista convencido poida estar aquí", remarcou.
No acto tamén participaron Marta Rivera de la Cruz, número dous do PP na lista ao Congreso dos Deputados por Madrid ou o vicesecretario de Cultura e Sociedade Aberta do PP, Borja Sémper. Precisamente, este último defendeu o labor do seu partido respecto da cultura.
