Alfonso Rueda percorre Galicia en autobús coa nova campaña 'Galicia non para!'
Os populares lanzan tamén a web rueda.gal para que a cidadanía lle traslade "o que lle preocupa, o que vai ben e o que poden mellorar"
Por Europa Press / Redacción | SANTIAGO DE COMPOSTELA | 01/10/2023 | Actualizada ás 17:50
O presidente do PPdeG, Alfonso Rueda, fixo a súa primeira parada este domingo en Bandeira, no municipio pontevedrés de Silleda, co autobús de 'Galicia non para!', a nova campaña do PPdeG coa que percorrerá Galicia co obxectivo de manter un contacto máis directo cos galegos e as galegas e "profundar así nas súas preocupacións reais".
O autobús instalouse na Praza da Feira e ata alí achegáronse numerosos veciños. Todos eles, detallou o PPdeG nunha nota de prensa, tiveron a oportunidade de "conversar e tomar unha cana de cervexa sen alcol" co presidente dos populares galegos, que chegou a Bandeira pouco despois de que o autobús fixese parada e que, engadiu, mostrouse "moi satisfeito de ter a oportunidade de manter este tipo de encontros directos e espontáneos coa cidadanía, sen intermediarios".
Durante as próximas semanas, o autobús de 'Galicia non para!' continuará a súa viaxe por diversos concellos do catro provincias galegas.
NOVA WEB
Ademais, o PPdeG puxo en marcha a páxina web rueda.gal, a través da cal quen o desexe poderá trasladarlle a Alfonso Rueda "todo aquilo que lles preocupa, o que vai ben e o que cren que pode mellorar".
Deste xeito, explican os populares, aquelas persoas que non poidan achegarse de maneira presencial aos lugares onde estea instalado o autobús da campaña, poderán facer chegar as súas sugestiones a través desta web.
Tal e como trasladaron os populares, Rueda falará coa xente, neste percorrido por Galicia, de economía, de emprego, de familia, de educación ou do agro. Pola súa banda, a cidadanía "poderá facerlle chegar as súas incertezas e propostas directamente, nunha conversación persoal".
