Xa se poden solicitar as axudas para os comedores escolares
Contan cun orzamento de 1,6 millóns de euros e distribúense en función do número de menús que se dispensen nos centros. Os que ofrezan menos de 100 menús percibirán 0,78 euros por usuario e día, os de entre 101 e 200 menús recibirán 0,72 euros e os que superen os 200, 66 céntimos.
Por Europa Press / Redacción | SANTIAGO | 24/10/2023 | Actualizada ás 11:24
As axudas da Xunta para as entidades que xestionan comedores escolares poden solicitarse durante o próximo mes a contar desde este martes, no que foi publicada a convocatoria das subvencións no Diario Oficial de Galicia.
En total, a Administración autonómica dedica a esta cuestión un orzamento de 1,6 millóns de euros, que serán repartidos en función do número de menús que dispensen os comedores xestionados por asociacións ou federacións de pais ou outras entidades.
As subvencións están enfocadas a cubrir os gastos de elaboración dos menús, o persoal, limpeza, enxoval e outras cuestións necesarias para a prestación do servizo de comedor en centros escolares.
As contías oscilan en función da media de menús que repartan ao día en cada comedor. Así, os que ofrezan menos de 100 menús percibirán 0,78 euros por usuario e día, os de entre 101 e 200 menús recibirán 0,72 euros e os que superen os 200, 66 céntimos.
As axudas poden solicitarse desde este martes ata o 24 de novembro, cando se cumprirá un mes da publicación da orde no DOG.
