Novo terremoto en Galicia con epicentro en Muxía déixase sentir en varios puntos da Costa da Morte

A localidade coruñesa de Muxía foi epicentro á primeira hora deste luns dun tremor de terra de magnitude 3,1 que se deixou sentir nos municipios lindeiros. Acontece logo doutro sismo que tivo como centro a localidade de Oroso, tamén na Coruña, hai cinco días.

En concreto, segundo os datos do Instituto Xeográfico Nacional, o tremor tivo lugar ás 6,38 horas da mañá nunha área rodeada polas aldeas de Quintáns, Cebráns, Fumiñeo e Castelo, a só un quilómetro de profundidade.

Os rexistros do IGN apuntan a que o tremor se sentiu, ademais de en Muxía, en varias zonas de Vimianzo (Baíñas, A Gándara, Caxadas ou Vilaseco, entre outras) e, con menor intensidade, en Cee e Dumbría.

Tremor de 3,1 graos en Muxía | Fonte: CENTRO XEOGRÁFICO NACIONAL