18F.- Cando se comezarán a coñecer os resultados de participación e as votacións deste domingo?

A Xunta informará este domingo en catro comparecencias do desenvolvemento, os datos de participación e os resultados das eleccións ao Parlamento de Galicia convocadas para este domingo. O director xeral de Emerxencias, Santiago Villanueva, visitou este sábado o centro de prensa desde onde este domingo se difundirán os resultados das Eleccións ao Parlamento de Galicia, nas que están chamados a votar máis de 2,2 millóns de galegos, nas 3.951 mesas distribuídas polos 2.346 locais electorais.

Será o propio Santiago Villanueva o encargado de comparecer ante os medios de comunicación na xornada electoral. En concreto están previstas catro comparecencias: a primeira, ás 10.30 horas, para informar da apertura de mesas e posibles incidencias; outras dúas para trasladar os avances de participación, ás 12.30 horas e ás 17.30 horas; e outra máis unha vez o reconto estea avanzado para informar os resultados provisionais do escrutinio, a partir das 21.30 horas, aproximadamente.

O censo electoral para estas eleccións ao Parlamento galego ascende a 2.693.633 persoas, xa que aos máis de 2,2 millóns de electores censados en Galicia, hai que sumarlle os 476.544 inscritos no Censo Electoral de Residentes Ausentes (CERA). O electorado contará con preto de 41 millóns de papeletas e máis de catro millóns de sobres de votación. Durante a xornada electoral, tamén foron designados para toda Galicia 2.628 representantes da administración, que contan con dispositivos electrónicos para a transmisión de datos da votación desde os colexios electorais ata o centro de procesamiento da información.

O dispositivo de seguridade estará formado por máis de 7.300 efectivos dos distintos corpos e forzas de seguridade. "Esperamos que o proceso se desenvolva con total normalidade", desexou Villanueva. Ademais, o director xeral tamén lembrou nunha comparecencia ante os medios este sábado que está dispoñible para descarga a aplicación móbil das eleccións, así como a páxina web https://resultados2024.xunta.gal , nas que se poderán seguir en tempo real as comparecencias de prensa, e os datos de participación e o avance en directo do escrutinio a nivel autonómico, provincial, comarcal e por concello, incluíndo comparativas coas eleccións do 2020. Tamén estará operativa a páxina web https://eleccionsgalicia2024.gal/, onde se centraliza toda a información de interese relacionada co proceso electoral.

O director xeral de Emerxencias e Interior, Santiago Villanueva, comparece ante os medios | Fonte: XUNTA