Eurodeputados do BNG, Podemos e Anticapitalistas viaxarán ao paso de Rafá para denunciar o xenocidio palestino
Van xa máis de catro meses de ofensiva israelí e case 30.000 asasinados.
Por Europa Press / Redacción | BRUSELAS | 23/02/2024 | Actualizada ás 18:11
Os eurodeputados Idoia Villanueva, de Podemos, Miguel Urbán, de Anticapitalistas, e Ana Miranda, de BNG, viaxan este sábado ao paso de Rafá, entre a Franxa de Gaza e Exipto, para denunciar desde este punto crave o "xenocidio" de Israel contra o pobo palestino e pór de relevo a emerxencia sanitaria na Franxa, cando se cumpren máis de catro meses de ofensiva israelí que deixou case 30.000 mortos.
A visita conxunta ten o obxectivo de "esixir a fin do xenocidio que Israel está a executar contra o pobo palestino e as súas violacións do dereito internacional","visibilizar a emerxencia humanitaria en Gaza" e "coñecer e apoiar o traballo vital que desempeñan axencias de Nacións Unidas como UNRWA", explicaron os parlamentarios nun comunicado.
Durante a súa visita de tres días á zona, os eurodeputados de esquerda veranse con representantes e traballadores de UNRWA, ONU e outras ONGs que operan na rexión. Precisamente o martes no pleno do Parlamento Europeo en Estrasburgo celebrarase un debate co Alto Representante da UE para Política Exterior, Josep Borrell sobre a situación en Gaza, ocasión na que se discutirá a orde da Corte Internacional de Xustiza sobre a crise na Franxa ou a retirada de fondos a UNRWA tras as acusacións de Israel contra unha decena de traballadores.
En declaracións previas á viaxe, Villanueva denunciou que Israel "asasinou a máis de 30.000 persoas en Gaza e continúa co apartheid e a limpeza étnica", polo que reclamou un cesamento do lume e que "deixe de bloquear a entrada de axuda humanitaria de forma inmediata".
Para Miguel Urbán, os gobernos dos 27 son "cómplices" de Israel e teñen que "aplicar medidas contundentes como o embargo de armas e a ruptura do acordo comercial", mentres que Ana Miranda denunciou "o xenocidio" a mans do Exército israelí e "o seu flagrante incumprimento dos Dereitos Humanos desde hai décadas".
